पालघर (वृत्तसंस्था) पालघर (Palghar) येथील एका ४८ वर्षीय नराधमाने तरुणीच्या मानसिक स्थितीचा फायदा घेत तिच्यावर वारंवार अत्याचार केला आहे. गर्भवती राहिल्यानंतर पीडित तरुणीने तिच्यासोबत घडलेला प्रकार आपल्या आईला सांगितला आहे. या प्रकरणी मनोर पोलिसांनी बलात्कारासह विविध कलमाअंतर्गत गुन्हा दाखल करत आरोपीला बेड्या ठोकल्या (Accused arrested) आहेत.
पोलिसांनी दिलेल्या माहितीनुसार, संबंधित घटना पालघर जिल्ह्यातील विक्रमगड याठिकाणी घडली आहे. तर पीडित तरुणी ही मानसिकदृष्ट्या विकलांग आहे. गावातील ४८ वर्षीय नराधम आरोपी तिच्या मतिमंदपणाचा फायदा घेत तिच्यावर लैंगिक अत्याचार करत होता. पीडितेनं विरोध केला असता आरोपी तिला जीवे मारण्याच्या धमक्या द्यायचा. मागील ५ महिन्यांपासून आरोपीनं वेळोवेळी पीडित तरुणीला धमकावून तिच्यावर अत्याचार केले आहेत. दरम्यान पीडित तरुणी गरोदर राहिल्यानंतर तिने घडलेला सर्व प्रकार आपल्या आईला सांगितला आहे. पीडितेसोबत घडलेलं कृत्य ऐकून आईलाही धक्का बसला आहे. घडलेला प्रकार कळताच पीडित तरुणीच्या आईनं तातडीने मनोर पोलीस ठाण्यात जाऊन फिर्याद दाखल केली आहे. पोलिसांनी बलात्कारासह विविध कलमाअंतर्गत गुन्हा दाखल करत नराधमाला बेड्या ठोकल्या आहेत. मतिमंद मुलीवर झालेल्या अत्याचाराची माहिती समोर येताच गावात एकच खळबळ उडाली आहे. पोलीस आरोपीची कसून चौकशी करत आहेत.
