श्रीनगर (वृत्तसंस्था) काश्मीर खोऱ्यात (Kashmir Valley) हत्या सत्र सुरूच आहेत. येथे सातत्याने हिंदूंना लक्ष्य केले जात आहे. कुलगाम जिल्ह्यात (Kulgam District) पुन्हा एकदा दहशतवाद्यांनी दुसऱ्या राज्यातील एका बँक कर्मचाऱ्यावर हल्ला केला. गोळी लागल्याने बँक मॅनेजर (Bank Manager) जखमी झाले. त्यांना रुग्णालयात नेण्यात आले, मात्र उपचारादरम्यान त्यांचा मृत्यू झाला. बँक मॅनेजरचं नाव विजय कुमार असं सांगितलं जात आहे.
विजय कुमार हे एका गावातील बॅंकेत मॅनेजर म्हणून काम करायचे. काही दिवसांपूर्वी विजय कुमार यांनी या ठिकाणी नोकरी ज्वाईन करत मॅनेजरचा पदभार स्वीकारला होता. कुलगाम जिल्ह्यातील अरेह मोहनपोरा येथील इलाकी देहाती बँकेतील बँक व्यवस्थापक असलेल्या विजय कुमार दहशतवाद्यांनी गोळीबार केला. या दहशतवादी घटनेत त्यांना गोळी लागल्याने गंभीर दुखापत झाली. विजय कुमार हे राजस्थानमधील हनुमानगडचे रहिवासी आहेत. दरम्यान या घटनेनंतर परिसरात खळबळ उडाली आहे. पोलिसांनी या परिसराची नाकेबंदी केली असल्याचं जम्मू काश्मिर पोलिसांनी सांगितलं आहे.
दरम्यान, काश्मिरात हत्येच्या घटना वाढल्यानं गृहमंत्रालय अलर्ट मोडवर आलं आहे. केंद्रीय गृहमंत्री अमित शाह उद्या जम्मू-काश्मीरचे उपराज्यपाल मनोज सिन्हांसोबत बैठक घेणार आहे. अमित शाह हे जम्मू-काश्मीरमधील सुरक्षेचा आढावा घेणार असल्याची देखील माहिती आहे.
