मुंबई (वृत्तसंस्था) आपल्या देशात आणि राज्यात कोरोनाला प्रतिबंध करणाऱ्या लसीकरणाची जोरदार पूर्व तयारी सुरु झाली आहे. केंद्र सरकारने कोरोना लसीकरणाबाबत मायक्रो प्लॅनिंग सुरु केलं आहे. लस देण्यासाठी कार्यपद्धती आहे. ज्या तारखेला लस द्यायची आहे त्या संबंधीचा मेसेज त्या व्यक्तीला केला जाईल. त्यानंतर ती व्यक्ती आल्यावर ओळख पटवली जाईल. त्यानंतर त्याला लस देण्यात येईल अशी माहिती महाराष्ट्राचे आरोग्य मंत्री राजेश टोपे यांनी दिली आहे.
कोरोना लसीकरणसाठी १८ हजार जणांना प्रशिक्षण द्यायचं काम आता पूर्ण होईल तसेच स्टोरेज साठी कोल्ड चेन व्यवस्था झाली असल्याची माहिती आरोग्यमंत्री राजेश टोपे यांनी दिली. केंद्राने मोफत लसीकरण केलं पाहिजे अशी सगळ्या राज्यांची अपेक्षा आहे. असे झाल्यास मोफत लसीकरण शक्य असल्याचे ते म्हणाले. मोफत लस मिळावी अशी आमची अपेक्षा आहे. केंद्र सरकार सूचना देईल ती कार्यवाही करु असे ते म्हणाले. लसीकरणाबाबत केंद्र सरकार माहिती मागवत आहे. हेल्थ वर्कर्स, अत्यावशक सेवेतील कर्मचारी, ५० वर्षांवरील नागरिक शिवाय इतर आजार असलेले ५० वर्षांवरील नागरिक यांची माहिती गोळा केली जाते आहे असंही आरोग्य मंत्री राजेश टोपे यांनी स्पष्ट केलं. लस देण्यासाठी कार्यपद्धती आहे. ज्या तारखेला लस द्यायची आहे त्या व्यक्तीला मेसेज मिळणार, त्यांनंतर त्याची ओळख पटवून त्याला लस दिली जाणार असल्याचे ते म्हणाले. उत्तर प्रदेशमध्ये मेडिकल स्टाफ सुट्ट्या रद्द केल्या पण आपल्याला तसं काही करायची गरज नाही. आपल्याकडे मनुष्यबळ उपलब्ध असून गरज पडली तर सुट्टी रद्द होईल असे ते म्हणाले. लस केंद्र सरकार पुरवेल अशी माझी खात्री आहे. जी काम राज्य सरकारने करायची ते आम्ही करत आहोत. लॉजीस्टिक,डेटा सगळं आम्ही करत आहोत, लसीकरणाच्या परिणाम त्या बाबत एक युनिट तयार केलं आहे. साधारण दोन कंपन्या सिरम आणि भारत बायोटेक लसीबाबत केंद्राकडे परवानगी मागितली आहे. आता केंद्राला निर्णय घ्यायचा असल्याचे राजेश टोपे म्हणाले.
