जळगाव (प्रतिनिधी) केंद्र शासनाच्या महिला व बाल विकास मंत्रालयामार्फत महिला व बाल विकास क्षेत्रात उल्लेखनीय कामगिरी करणाऱ्या महिला, संस्था, कंपन्या यांना नारी शक्ती पुरस्कार दिला जाणार आहे. यासाठी महिला व बाल विकास मंत्रालयमार्फत देण्यात येणाऱ्या नारी शक्ती पुरस्काराकरिता प्रस्ताव सादर करण्याचे आवाहन करण्यात आले आहे.
सन २०१९-२० या वर्षाकरीता सदर पुरस्कारासाठी पात्र महिला कार्यकर्त्या, स्वयंसेवी संस्था, कंपन्या, सार्वजनिक क्षेत्रातील उद्योग इ. कडून अर्ज ऑनलाईन मागविण्यात येत आहेत. शासन पत्रात नमुद मार्गदर्शक सुचनेनुसार नारी शक्ती पुरस्कारासाठी अर्जदाराने अर्ज/नामनिर्देशन योग्य त्या कागदपत्रांसह केवळ ऑनलाईन पध्दतीने केंद्र शासनाचे www.narishaktipuraskar.wcd.gov.in / www.wcd.nic.in या संकेतस्थळावर भरावयाचे आहेत. केवळ ऑनलाईन पध्दतीने केलेले अर्जच स्वीकारले जातील, असे मार्गदर्शक सुचनांमध्ये नमूद केले आहे.
प्रस्तावातील अटी व शर्ती व विहीत नमुन्यातील फॉर्मसाठी सदर पुरस्काराची नियमावली व निकष केंद्र शासनाच्या संकेतस्थळावर उपलब्ध आहे. अधिक माहितीसाठी जिल्हा महिला व बाल विकास अधिकारी कार्यालय, (०२५७-२२२८८२८) आकाशवाणी चौक, प्रशासकीय इमारत, दुसरा मजला, जळगाव यांचेशी संपर्क साधावा. असे विजयसिंग परदेशी, जिल्हा महिला व बाल विकास अधिकारी, जळगाव यांनी एका प्रसिध्दी पत्रकान्वये कळविले आहे.
