जळगाव (प्रतिनिधी) जिल्ह्यातील खाजगी शाळांचा मनमानी कारभार सुरु असून शाळेची फी न दिल्यामुळे काही विद्यार्थ्यांना शिक्षणापासून वंचित राहावे लागत आहे. या विरोधात आज जिल्हाधिकारी कार्यालयासमोर महाराष्ट्र स्टुडंट्स युनियनचे जळगाव विभाग प्रमुख अँड. अभिजित जितेंद्र रंधे यांच्या नेतृत्वाखाली अन्नत्याग साखळी उपोषणाला सुरुवात करण्यात आली आहे.
दिलेल्या निवेदनात नमूद केले आहे की, गेल्या काही दिवसापूर्वी महाराष्ट्र स्टुडंन्ट्स युनियनतर्फे जळगाव जिल्ह्याचे जिल्हाधिकारी अभिजीत राऊत व शिक्षणअधिकारी, शिक्षण सभापती जिल्हा परिषद, जळगाव यांना खासगी शाळेच्या मनमानी फीस घेण्याच्या व फीस न भरल्यामुळे विद्यार्थ्यांना ऑनलाइन वर्गातून काढून टाकल्याचा प्रकार आपल्याला निवेदनातून कळविला होता व त्यापासून विद्यार्थ्यांना व पालकांना यातून दिलासा मिळावा, अशी मागणी आम्ही केली होती परंतु कोणतेही उत्तर प्राप्त न झाल्यामुळे पुन्हा स्मरणपत्र सुद्धा देण्यात आलेले होते.
कोविड-१९ च्या पार्श्वभूमीवर महाराष्ट्रासमोर जे आर्थिक संकट आले आहे. त्यात सर्वसामान्य माणूस होरपळून निघालेला आहे. अशातच काही खाजगी शाळा ह्या मनमानी पध्दतीने विद्यार्थ्यांकडून फीस आकारून त्यांची आर्थिक पिळवणूक करीत असल्याचे वेळोवेळी निदर्शनास आलेले आहे. टाळेबंदीमुळे गेल्या दीडवर्षा पासून ऑनलाईन शिकवणी सुरु आहेत तरी देखील काही शाळा ह्या कोविड सुरू होण्याआधी जितकी फीस आकारली जात होती त्याप्रकारे आताही फी आकारत आहेत. सध्याच्या परिस्थितीमुळे पालक हतबल झाले असून त्यांच्याकडे वेळेवर फीस भरण्याची पैसे नसल्यामुळे विद्यार्थ्यांना ऑनलाईन शिकवणीतून बेदखल केले जात आहेत. त्यामुळे त्यांच्या पाल्यांवर शिक्षणापासून वंचित होण्याची भीती निर्माण झालेली आहे आणि भीतीपोटी आपल्या पाल्यावर अडचण येऊ शकते जसे की गुण कमी मिळणे, त्या विद्यार्थ्यांवर काट खाणे किंवा कुठल्याही प्रकारे त्याचे शैक्षणिक नुकसान होऊ शकते व त्यांचे उज्वल भविष्यात अडचणी येऊ शकता, या खातीर पालक हे उघडपणे तक्रार करत नाही आहे.
तरी अशा प्रतिकूल परिस्थितीत देखील सर्वसामान्य पालक आपल्या पोटाला चिमटा काढून शाळेची फीस भरण्यास तयार आहे. परंतु, सध्याच्या परिस्थितीचा विचार करता खासगी शाळांची मनमानी थांबवण्यासाठी आपण ठोस पाऊले उचलणे गरजेचे आहे. म्हणून प्रशासनाकडे वेळोवेळी मागणी केली होती की, खाजगी शाळांनी फक्त शिकवणी शुल्क आकारून पालकांना फीस भरण्यासाठी सुलभ हफ्ते प्रदान करून विद्यार्थ्यांची व त्यांच्या पालकांची गळचेपी थांबवावी परंतु प्रशासनाकडून कोणताच निर्णय होत नसल्याने नाईलाजास्तव आम्हाला विद्यार्थ्यांच्या न्याय आणि हक्कासाठी अन्नत्याग साखळी उपोषण करावे लागत आहे.
या निवेदनावर अँड. अभिजित रंधे, अँड. निलेश जाधव, दिपक सपकाळे, सचिन बिऱ्हाडे, चेतन चौधरी, निखिल बिरारी, संदीप कोळी, अतुल बनसोडे, संतोष भंगाळे, भावेश कोल्हे, ललित पाटील, यशोदीप महाले, महेश सगणे, आकाश धनगर आदींच्या स्वाक्षऱ्या आहेत.
