चोपडा (प्रतिनिधी) महाराष्ट्र राज्य सरकारने सार्वजनिक आरोग्य विभाग कोविड नियंत्रण व मृत्युदर कमी करण्यासाठी माझे कुटुंब माझी जबाबदारी हा कार्यक्रम १५ सप्टेंबर ते २५ ऑक्टोंबर काळात राबवण्याचे ठरवले आहे. आशांच्या मूलभूत बाबीची जाणीव करून देण्यासाठी येत्या २८ सप्टेंबर २०२० पासून तीन दिवस सलग राज्यव्यापी संपाची हाक महाराष्ट्र राज्यातील आशा व गटप्रवर्तक संघटनांच्या कृती समीतीने दिली आहे.
जळगाव जिल्हा आयटकने याबाबत प्रसिद्धी पत्रक दिले आहे. संपाच्या तयारीसाठी चोपडा येथे महात्मा फुले नगरमध्ये आशा स्वयंसेवकांची मीटिंग घेण्यात आली. यावेळी जळगाव जिल्हा आशा व गटप्रवर्तक संघटनेचे अध्यक्ष अमृत महाजन यांनी आशा गटप्रवर्तकांसाठी महाराष्ट्र राज्यात व जळगाव जिल्ह्यात कोरोना महामारी काळात केलेल्या आंदोलनाची माहिती दिली. शेवटी २० मागण्यांचे निवेदन तयार करण्यात आले असून त्यात म्हटले आहे की ‘माझे कुटुंब माझी जबाबदारी’ या कार्यक्रमात नेमलेल्या पथकात गैरहजर राहणारे किंवा सहभाग न देणारे सभासद यांचे ऐवजी पर्यायी महिला पुरुष स्वयंसेवक त्वरित नेमावे. तसेच या पथकात सामील कोरोना योद्ध्यांना एन-९५ मास्क, हात मोजे, पीपीईकीट, सॅनिटायझर, साबण व इतर संरक्षक साधने द्या. लागणारी स्टेशनरी व छापील फॉर्म पुरवावेत. मोबाईल उपलब्ध न झाल्यास ऑनलाइन न करता लेखी स्वरूपामध्ये नोंदी घ्याव्यात. आशा वर्कर गटप्रवर्तकांना आरोग्य खात्यात कायम करा. प्रतिदिन साडेतीनशे रुपये मोबदला द्यावा.
आरोग्य खात्यातील रिक्त जागा व अतिरिक्त आशाची भरती करावी, आशांना आठवड्यातून एक दिवस सुट्टी द्यावी, त्यांच्या कामाचे आठ तास त्यात एक तास सुट्टी टाकून कामाचा दिवस ठरवावा, नवीन आशांचे ट्रेनिंग घ्यावे, नगरपालिका ग्रामपंचायततर्फे थकीत प्रोत्साहन भत्ता मिळावा, आशांना सन्मानजनक वागणुक मिळावी, आशांवरील हल्ले रोखण्यासाठी उपाययोजना कराव्यात, आशांना आरोग्य विमा-पन्नास लाखाचे कवच ३१ डिसेंबर २०२० पर्यंत वाढवावे, भुसावळ तालुक्यातील खडकाच्या मयत आशा सायराबी अन्वर शेख यांच्या वारसाना ५० लाख रुपये विमा कवच लाभ द्यावा, नवीन आशांचे ट्रेनिंग व्हावे, आशा गटप्रवर्तकांना जाहीर केलेली मानधन वाढ मिळावी, अशा विविध मागण्यांसाठी ३ दिवसाचा संप करण्यात येणार आहे. असा इशारा देणारे निवेदन चोपडा नगरपालिकेचे उपमुख्य कार्यकारी अधिकारी ठाकूर साहेब व नागरी प्राथमिक आरोग्य केंद्र चे वैद्यकीय अधिकारी चंद्रकांत बारेला यांना देण्यात आले. यावेळी योगिता बाविस्कर, पल्लवी सोनवणे, ज्योती सोनवणे, शीला सपकाळे, संजना वसावे, आरती कापुरे, पुनम सोनवणे, सविता ओली, सुवर्णा माळी, दिपाली बावा, मंगला निकुंबे, मनीषा बारेला, नूतन पाटील, रोहिणी देशमुख, वर्षा धनगर, दीक्षा शिंदे, वैशाली चौधरी, हिना पिंजारी, तन्जीम गणी, गायत्री जोशी, आदी शहरातील सर्व आशा निवेदन देताना हजर होत्या.
