जळगाव (प्रतिनिधी) भरणा केलेल्या व्यवसाय कराची ऑनलाईन पावतीचे बनावट दस्ताऐवज तयार करुन तो खोटा असल्याचे माहिती असूनही तो खरा असल्याचे भासवून शासनाची फसवणुक करण्याचा प्रयत्न केला. ही घटना उघडकीस आल्यानंतर प्रादेशिक परिवहन अधिकारी कार्यालयातील कर वसुली अधिकारी यांनी रामानंद नगर पोलिसात तक्रार दिली. त्यानुसार संशयित सुलतान बेग नझीर बेग मिर्झा (रा. उस्मानिया पार्क) व शाकीब रहुफ शेख (रा. जारगाव चौफुली, ता. पाचोरा) यांच्याविरुद्ध फसवणुकीचा गुन्हा दाखल करण्यात आला.
शहरातील प्रादेशिक परिवहन अधिकारी कार्यालयात चंद्रशेखर शंकरराव इंगळे हे कर वसुली अधिकारी नियुक्त आहे. त्यांच्याकडे कार्यालयातील परवाना विभागाचा कारभार सोपविण्यात आला आहे. दि. २३ एप्रिल रोजी कार्यालयात असतांना शाकीब रहुब शेख हा त्यांच्या मालकीचे (एमएच १८, बीए ०२२१) चा राष्ट्रीय परवाना रद्द करण्यासाठी विनंती अर्ज व वाहनाच्या कागदपत्रांसह सुलतान बेग नजीर बेग मिर्झा हा एजंट इंगळे यांच्याकडे परवाना विभागात घेवून आले होते. ती कागदपत्रे तपासणी करुन वरिष्ठांकडे पाठविण्यासाठी जमा करुन ते निघून गेले होते.
पावत्यांवर संशय आल्याने केली सत्यता पडताळणी
इंगळे यांनी संपुर्ण कागदपत्राची तपासणी केली असता, त्यांना कागदपत्रांमध्ये जमा केलेले वित्त दाताचे नाहरकत प्रमाणपत्र, त्यांनी जोडलेल्या व्यवसाय कराच्या पावत्यांमध्ये ऑनलाईन कराची पावती ही बनावट असल्याचा संशय आला. त्यामुळे त्यांनी पावत्यांची सत्यता पडताळणीसाठी त्या वरिष्ठ अधिकाऱ्यांच्याकडे पाठविल्या.
वाहन मालकासह एजंटविरद्ध फसवणुकीचा गुन्हा
संबंधितांनी शासनाची फसवणुक करण्याच्या उद्देशाने सादर केला. दरम्यान, चंद्रशेखर इंगळे यांनी रामानंद नगर पोलिसात तक्रार दिली असून त्यानुसार सुलतान बेग नझीर बेग मिर्झा (रा. उस्मानिया पार्क) व शाकीब रहुफ शेख (रा. जारगाव चौफुली, ता. पाचोरा) यांच्याविरुद्ध फसवणुकीचा गुन्हा दाखल करण्यात आला. तपास सपोनि संदीप पाटील करीत आहे.
