मुंबई (वृत्तसंस्था) द्वेषबुद्धीने काम करणाऱ्या वाहिन्या आणि वर्तमानपत्राची नावं आम्ही काढत आहेत. व्यवसायावर त्याचा कोणत्याही प्रकारे परिणाम झाला तरी आम्ही त्या माध्यमांचे समर्थन करु शकत नाही,असे म्हणत बजाज ऑटोचे प्रमुख राजीव बजाज यांनी जाहिरातींसाठी तीन वाहिन्यांना ब्लॅकलिस्ट म्हणजेच काळ्या यादीत टाकण्यात आल्याची माहिती दिली आहे.
मुंबई पोलिसांच्या तपासात टीआरपी रॅकेट उघडकीस आलं आहे. टीआरपी एजन्सीच्या आजी-माजी कर्मचाऱ्यांच्या मदतीने हे रॅकेट चालवले जात होते. यात पैसे देऊन रेटिंग वाढवण्यात आल्याचे समोर आले आहे. ‘हंसा’ ही एजन्सी टीआरपी रेटिंग वाढवण्यासाठी या चॅनेल्सना मदत करत होती. हा घोटाळा उघडकीस आल्यानंतर बजाज यांनी या तीन वाहिन्यांवर बंदी घातली आहे. सशक्त ब्रँड हा एक पाया आहे, ज्यावर आपण मजबूत व्यवसाय बनवतो. आमची कंपनी कोणत्याही द्वेषबुद्धीला आणि समाजात विष पसरवणाऱ्या मानसिकतेला मान्यता देत नसल्याचे, बजाज यांनी स्पष्ट केले आहे.
