जळगाव (प्रतिनिधी) ‘यूट्यूब’वरील (Youtube) व्हिडिओ पाहून बनावट चलनी नोटा छापणाऱ्या तरुणाला जळगाव पोलिसांनी एमआयडीसीतील व्ही सेक्टर मधून छापा टाकून अटक केली आहे. देविदास पुंडलिक आढाव (वय-३०,रा. कुसुंबा ता. जि. जळगाव), असे संशयित आरोपीचे नाव असून त्याच्या विरोधात एमआयडीसी पोलीस ठाण्यात गुन्हा दाखल करण्यात आला आहे. (Jalgaon Crime News)
कुसुंबा तालुक्यातील देविदास पुंडलिक आढाव हा भारतीय चलनाच्या नकली नोटा तयार करून ते बाजारात वापर करत असल्याची गोपनीय माहिती विभागीय पोलिस अधिकारी संदीप गावित यांना मिळाली होती. त्यानुसार त्यांनी संशयित आरोपीला पकडण्याच्या सूचना दिल्या. सूचनेप्रमाणे रामानंदनगर पोलीस ठाण्याचे पोलीस उपनिरीक्षक गोपाल देशमुख, पोलीस नाईक रेवानंद साळुंखे, चंद्रकांत पाटील, पोलीस कॉन्स्टेबल विजय जाधव, सचिन साळुंखे यांनी बुधवारी १ मार्च रोजी छापेमारी केली.
जळगाव पोलिसांनी एमआयडीसीच्या व्ही सेक्टरमध्ये सापळा रचून नकली नोटा वापरात बाजारात देत असल्याची खात्रीलायक सूचना मिळाली, त्यानुसार पोलिसांनी दुपारी ३ वाजेच्या सुमारास संशयित आरोपी देविदास आढाव याला रंगेहात पकडले. त्याची झाडाझडती घेतली असता त्याच्या जवळील कापडी पिशवी जवळपास ४६ हजाराच्या नकली नोटा आढळून आल्या. या तरुणाने ‘यूट्यूब’वर व्हिडिओ पाहून मोबाईल आणि प्रिंटरच्या सहाय्याने नकली नोटा छापत असल्याचे मान्य केले. याप्रकरणी पोलीस कॉन्स्टेबल सचिन साळुंखे यांनी दिलेल्या फिर्यादीवरून एमआयडीसी पोलीस ठाण्यात संशयित आरोपी देविदास आढाव याच्या विरोधात गुन्हा दाखल करण्यात आला असून पुढील तपास पोलीस उपनिरीक्षक निलेश गोसावी हे करीत आहे.
