धरणगाव (प्रतिनिधी) येथील शतकोत्तरी पी. आर. हायस्कूल मध्ये ‘भारत अमृत महोत्सव’ या राष्ट्रीय उपक्रमांतर्गत शाळेचे माजी विद्यार्थी तथा भारतीय सैन्यदलातील निवृत्त सैनिक नवनीत पुंडलिक पाटील यांचा मुख्याध्यापक डॉ. संजीवकुमार सोनवणे यांच्या हस्ते शाल, बुके आणि पुस्तक देऊन सत्कार करण्यात आला.
याप्रसंगी शाळेच्या एनसीसी विभागाचे अधिकारी डी.एस.पाटील यांनी नवनीत पाटील यांनी देशसेवेसाठी केलेल्या कार्याची माहिती दिली. नवनीत पाटील हे १९६९ साली येथे भारतीय सैन्यदलात तोफखाना(Artillery)विभागात नियुक्त झाले.धरणगाव तालुक्यातील बांभोरी बु ।। येथील सैन्यात जाणारे ते पाहिले मानकरी होते. सैन्यदलात सेवा बजावत असतांना जम्मू-काश्मीर, अंबाला, झांसी,पठाणकोट या ठिकाणी सेवा बजावली.त्यांचा १९७० ला भारत- बांगलादेश मुक्ती सेनेत सक्रिय सहभाग होता. १९७१ च्या भारत-पाकच्या भीषण युद्धात पराक्रम गाजवल्याबद्दल सेना पदकाने त्यांना गौरविण्यात आले आहे. याशिवाय पंजाब मधील अमृतसर येथील सुवर्णमंदिरातील भिंद्रांवाला अतिरेक्यांच्या मुसक्या आवळण्याच्या स्व.पंतप्रधान इंदिराजी गांधी यांनी राबविलेल्या ‘मिशन रेड ब्लू स्टार ‘च्या सैन्य तुकडी मध्येही त्यांचा सक्रिय सहभाग होता.ज्या शाळेने आपल्याला सैन्य दलात जाण्यासाठी ऊर्जा दिली. त्या शाळेविषयी पाटील यांनी कृतज्ञता व्यक्त केली. कार्यक्रमाचे सूत्रसंचालन आणि आभार प्रदर्शन शिक्षक गणेशसिंह सूर्यवंशी यांनी केले. याप्रसंगी पाटील यांचे चिरंजीव योगेश पाटील, शाळेचे उपमुख्याध्यापक आर. के. सपकाळे, पर्यवेक्षिका डॉ.आशा शिरसाठ, ज्येष्ठ शिक्षक बापू शिरसाठ, कैलास वाघ आणि शिक्षक शिक्षकेतर कर्मचारी वर्ग उपस्थित होते.
