जळगाव (प्रतिनिधी) भाईचंद हिराचंद रायसोनी अर्थात बीएचआर (Bhr) पतसंस्थेतील घोटाळ्यातील संशयितांना जामिनासाठी मदत करण्याच्या मोबदल्यात 1 कोटी 22 लाख रुपये खंडणी मागितल्या प्रकरणी तत्कालिन विशेष सरकारी वकील प्रवीण चव्हाण, ऑडीटर शेखर सोनाळकर, उदय नानाभाऊ पवार या तीघांविरुद्ध गुन्हा दाखल आहे. आज संशयितांच्या अटकपुर्व जामीनावर सरकार पक्षाने हरकत नोंदवली आहे.
खंडणी गुन्ह्याचे फिर्यादी सूरज झवर यांनी गेल्या महिन्यात पुण्याच्या डेक्कन पोलिस ठाण्यात गुन्हा दाखल झाल्यानंतर हा गुन्हा चाळीसगाव शहर पोलिस ठाण्यात वर्ग करण्यात आला होता. त्यानंतर ऑडीटर शेखर सोनाळकर, अॅड. प्रवीण चव्हाण यांनी खंडणी घेतल्याचे काही पुरावे फिर्यादी झवर यांनी पोलिसांना दिल्याचा दावा आहे. दरम्यान, अटकेपासून संरक्षण मिळवण्यासाठी दोघांनी अटकपुर्व जामीन अर्ज दाखल केले होते. त्यावर न्यायाधीश जे. जे. मोहिते यांच्या न्यायालयात आज सुनावणी झाली. यावेळी सरकारी वकील सुरेंद्र काबरा यांनी जामीन देण्यास हरकत घेत पोलिस तपासातील महत्त्वाचे मुद्दे मांडले.
सरकारी वकील सुरेंद्र काबरा यांनी अटकेनंतर अधिक तपास करायचा असल्याची बाब न्यायालयाच्या समोर मांडली. तर फिर्यादी सूरज झवर यांनी शपथपत्र, कागदपत्र सादर केले आहेत. या कागदपत्रांचा अभ्यास करण्यासाठी अॅड. चव्हाण व सोनाळकर यांच्या वकीलांनी वेळ मागुन घेतली आहे. त्यामुळे पुढील सुनावणी 10 फेब्रुवारी रोजी होणार आहे.
