जळगाव (प्रतिनिधी) बीएचआर घोटाळ्यात पुणे आर्थिक गुन्हे शाखेच्या पथकाने आज सलग दुसऱ्या दिवशीही मॅरेथान जबाब नोंदणी सुरूच ठेवली. जामनेरसह जळगावातील 20 ते 22 जणांचे जबाब नोंदविण्यात आले. विशेष म्हणजे यातून गुन्ह्याशी संबंधित अत्यंत महत्वपूर्ण माहिती मिळाल्याचे कळते.
आर्थिक गुन्हे शाखेने सोमवारप्रमाणे आजही तब्बल २२ते २३ साक्षीदारांचे जबाब नोंदवले. पुढील काही दिवस साक्षीदारांचे जबाब नोंदविण्याचे काम सुरूच राहणार असल्याचेही कळतेय.
बीएचआर घोटाळ्यातील साक्षीदारांचे जाबजबाब नोंदविण्यासाठी पुणे आर्थिक गुन्हे शाखेचे पथक रविवारी सायंकाळी जळगावात येऊन धडकले होते. या पथकात पोलीस निरीक्षक संदीप भोसले यांच्यासह इतर तीन कर्मचाऱ्यांचा समावेश आहे. श्री. भोसले यांच्यासोबत आलेल्या पथकाने आज जामनेरसह जळगावातील उर्वरित साक्षीदारांचे जबाब नोंदवले. तसेच काही शासकीय कार्यालय आणि बीएचआरच्या नवी पेठेतील शाखेला ही भेट दिली असल्याचे कळते. दरम्यान, आज घेतलेल्या साक्षीदारांच्या जाबजबाबतून गुन्ह्याशी निगडीत अत्यंत महत्वपूर्ण माहिती मिळाल्याचे देखील कळते.
बीएचआर घोटाळ्यातील काही प्रमुख साक्षीदारांचे जबाब नोंदविण्यासाठी हे पथक जळगावात आले आहे. त्यानुसार दोन दिवसांपासून जबाब नोंदविण्याच्या काम मॅरेथॉन पद्धतीने आज देखील सुरू होते. आज सायंकाळपर्यंत कालप्रमाणे २२ ते २३ साक्षीदारांचे जबाब नोंदवून झाले होते. पुढील काही दिवसात औरंगाबाद-सोयगाव, धुळे, धरणगाव-पाळधी, अमळनेर यासह इतर ठिकाणच्या साक्षीदारांचे जबाब नोंदविण्यात येणार असल्याचे कळते.
पुणे आर्थिक गुन्हे शाखेचे पथक नेमकं कुणाचे आणि एकूण किती जणांचे जबाब घेणार आहे?, याबाबत अजून स्पष्ट माहिती मिळू शकली नसली, तरी शंभरहून अधिक साक्षीदारांचे जबाब नोंदविण्यात येणार असल्याचे कळते.
दुसरीकडे मुख्य संशयित सुनील झंवर याच्या जामीन अर्जावर पुणे न्यायालयात सुनावणी सुरू आहे. बचावपक्ष आणि सरकारी पक्षाने आपापली बाजू मांडली असून न्यायालयाच्या निर्णयाकडे सर्वांचे लक्ष लागून आहे.
