भुसावळ (प्रतिनिधी) घर विकत घेण्यासाठी कर्ज काढून आणलेल्या पैशांवर चोरट्यांनी डल्ला मारल्याची धक्कादायक घटना शहरातील वांजोळा रोडवरील श्रीहरी नगरात घडली. मिस्त्री काम करणारे मुकेशकुमार राधाकिसन कुमावत यांच्या घरातून चोरट्यांनी तब्बल १० लाखांची चोरून नेले आहेत. दरम्यान, भुसावळमध्ये दोन चोरीच्या घटना घडल्या असून रोकड आणि दागिन्यांसह साधारण १५ लाखांहून अधिकचा ऐवज लंपास झाला आहे.
९ लाख ९० हजारांची रोकड लांबवली !
मिस्त्री काम करणारे मुकेशकुमार राधाकिसन कुमावत हे कुटुंबासह शहरातील बांजोळा रोडवरील श्रीहरी नगरात भाडेतत्त्वावरील घरात राहतात. हेच घर विकत घ्यायचे असल्याने त्यांनी अडीच महिन्यांपूर्वीच बँकेत कर्ज प्रकरण केले होते. कर्ज मंजूर झाल्यानंतर त्यांनी ती रक्कम बँकेतून काढून घरात आणून सोफा काम बेडमध्ये लपवून ठेवली होती. रविवार, ७ रोजी दुपारी २.३० ते ३.३६ दरम्यान कुमावत कुटूंब बाहेर जाताच पाळत ठेवून असलेल्या चोरट्यांनी संधी साधली. दरवाजाचे कुलूप तोडून चोरट्यांनी घरातील सोफा कुशनमध्ये ठेवलली ९ लाख ९० हजारांची रोकड लांबवली. काही वेळात कुमावत कुटूंब घरी आल्याने घरफोडीचा प्रकार समोर आला.
पोलिसांना तातडीने माहिती दिल्यानंतर पोलिस उपअधीक्षक कृष्णात पिंगळे, प्रभारी निरीक्षक गजानन पडघण आदींनी भेट दिली. माहितगार चोरट्यांनी घरफोडी केल्याचा अंदाज आहे. तपास पोलिस निरीक्षक मंगेश जाधव करीत आहेत. जळगाव येथून श्वान पथक व ठसे तज्ज्ञांना चोलावले, पण श्वान घराच्या आजूबाजूला घुटमळले, चोरटे है घराच्या मागील बाजूने आल्याचा पोलिसांचा अंदाज आहे.
केळी व्यापाऱ्याकडे धाडसी घरफोडी !
खडका रोड पटेल कॉलनी भागातील रहिवासी इम्तिहाज युनूस बागवान हे (ता.७) जानेवारीला रात्री नऊ ते सकाळी साडेआठ वाजेला लग्नाला गेले होते. कोणीतरी अज्ञात चोरट्याने राहत्या घरात प्रवेश करून तीन लाख रोख व दोन लाख ४५ हजार रुपयांचे सोन्याचे दागिने असा एकूण ५ लाख ४५ हजार रुपयांचा मुद्देमाल चोरून घराचे चारही दरवाजे उघडे ठेवून पसार झाले. सदरील गुन्ह्याचा अधिक तपास सहाय्यक पोलीस निरीक्षक हरिष भोये करीत आहे.
