जळगाव (प्रतिनिधी) सात बारा उता-यावर स्वत:चे नाव लावण्यासाठी तडजोडीअंती बारा हजार रुपयांची लाच स्विकारणा-या पंटरसह कोतवालास जळगाव एसीबी पथकाने रंगेहात अटक केली आहे. रविंद्र लक्ष्मण धांडे असे भुसावळ तहसील कार्यालयात नेमणूकीला असलेल्या कोतवालाचे नाव आहे. तसेच हरिष देविदास ससाणे (रा.आंबेडकर नगर भुसावळ) असे कोतवालासाठी लाच स्विकारणा-या पंटरचे नाव आहे.
तक्रारदाराने सन 2022 मधे भुसावळ तालुक्यातील कु-हे पानाचे गावात स्वत:च्या नावे शेतजमीन विकत घेतली आहे. या शेतजमीनीच्या सात बारा उता-यावर तक्रारदारास स्वत:चे नाव लावायचे होते. याकामी त्यांनी तलाठी कार्यालय भुसावळ येथे प्रकरण सादर केले होते. भुसावळ मंडळ अधिकारी योगिता पाटील यांनी या प्रकरणात त्रुटी काढून तक्रारदारास कोतवाल रविंद्र धांडे यांना भेटण्यास सांगितले होते . त्यानुसार तक्रारदाराने कोतवाल रवींद्र धांडे यांची भेट घेतली. त्यावर मी तुमचे सात बारा उता-यावर मंडळ अधिकारी योगिता पाटील यांच्याकडून नाव लावून आणून देतो, मात्र त्यासाठी पंधरा हजार रुपयांची लाच द्यावी लागेल असे कोतवाल रविंद्र धांडे यांनी तक्रारदाराला सांगितले. तडजोडीअंती बारा हजार रुपयांची लाच खासगी इसम हरिष ससाने यांच्याकडे देण्याचे ठरले. कोतवालाच्या सांगण्यानुसार खासगी इसमाने लाच स्विकारताच एसीबी पथकाने दोघांना ताब्यात घेत कारवाई केली. दोघांविरुद्ध भुसावळ शहर पोलिस स्टेशनला गुन्हा दाखल करण्यात आला आहे.
पोलिस निरीक्षक संजोग बच्छाव यांच्यासह स.फौ. दिनेशसिंग पाटील, स.फौ.सुरेश पाटील, पो.हे.कॉ.अशोक अहिरे, पो.हे.कॉ.सुनिल पाटील, पो.हे.कॉ.रविंद्र घुगे, म.पो.हे.कॉ. शैला धनगर, पो.ना.जनार्दन चौधरी, पो.ना.किशोर महाजन, पो.ना.सुनिल पाटील पो.ना.बाळू मराठे, पो.कॉ.प्रदिप पोळ, पो.कॉ.राकेश दुसाने, पो.कॉ.सचिन चाटे, पो.कॉ.अमोल सुर्यवंशी, पो.कॉ.प्रणेश ठाकुर आदींनी या कारवाईत सहभाग घेतला.
