भुसावळ (प्रतिनिधी) शहरातील प.क.कोटेचा महाविद्यालयात झालेल्या बोगस शिक्षक भरती प्रकरणी भुसावळ शहर पोलिसात दाखल गुन्ह्यातील पाच संशयितांचा अटकपूर्व जामीन फेटाळण्यात आला आहे.
शिक्षकांनी दुसरीकडे कार्यरत असताना कोटेचा महिला महाविद्यालयात कार्यरत असल्याचे दाखवून शासनाचा 10 लाख 54 हजार 630 रुपयांचा पगार हडपत तसेच खोटी बिले व कागदपत्रे, ठराव करून शासनाची फसवणूक केल्याचा आरोप आहे. याप्रकरणी जयश्री न्याती यांच्या तक्रार अर्जावरून सहा संशयितांविरोधात गुन्हा दाखल आहे. संशयितांनी अटकपूर्व मिळण्यासाठी भुसावळ न्यायालयात अर्ज केल्यानंतर अटकपूर्व जामीन फेटाळण्यात आल्याने संशयितांच्या अडचणी वाढल्या आहेत.
फसवणूक प्रकरणी 7 सप्टेंबर 2023 रोजी अतिरीक्त सत्र न्यायाधीश यांच्या न्यायालयात झालेल्या सुनावणीनुसार, संस्थाध्यक्षा पद्माबाई मोतीलाल कोटेचा, संस्थेचे सचिव संजय सुरेशचंद्र सुराणा, प्रा.डॉ.मंगला साबद्रा, उपप्राचार्य जनार्दन विश्वनाथ धनवीज, शिक्षक रुकसाना बी.ताजमल हुसेन या पाच जणांचा अटकपूर्व जामीन अर्ज अतिरिक्त सत्र न्यायाधीशांशी फेटाळला. फसवणूक प्रकरणातील शिक्षिकेला कोटेचा सोसायटीतून तब्बल 40 लाखांचे कर्ज कर्ज देण्यात आले आहे. या पैशांचा फायदा संशयित आरोपींना झाला आहे का? अजून कोण कोणते व्यक्ती व कर्मचारी यांचा सहभाग असू शकतो? आदी कारणास्तव अटकपूर्व जामीन नामंजूर करण्यात आला आहे.
दरम्यान, अर्जदार जयश्री न्याती यांच्यातर्फे जामीन अर्जावर हरकत नोंदवण्यात आली होती. सरकार पक्षातर्फे सहाय्यक सरकारी वकील अॅड.मोहन देशपांडे यांनी सरकार पक्षाची बाजू प्रभावीपणे मांडली. भुसावळ शहर पोलीस निरीक्षक गजानन पडघण म्हणाले की, या प्रकरणातील सर्व दोषींना लवकरच अटक करण्यात येणार आहे.
