जळगाव (प्रतिनिधी) वस्तू व सेवाकर (जीएसटी) गुप्तचर महासंचालनालयाच्या केंद्रीय पथकाच्या नाशिक युनिटने जामनेर तालुक्यातील पहूर येथे टाकलेल्या धाडीतून खळबळ उडवून देणारी माहिती समोर आली आहे. सूत्रांनी दिलेल्या माहिती नुसार हा जीएसटी घोटाळा १०० कोटीच्या घरात आहे. जवळपास १०० हून अधिक खात्यातून हा व्यवहार झाला असून मुख्यसूत्रधार तथा लाभार्थी जळगावचा असल्याचे समोर आले आहे. दरम्यान, मुख्य सूत्रधाराची जळगावात फायनान्स कंपनी आहे.
डायरेक्टर जनरल ऑफ जीएसटी इंटेलिजेंस (डीजीजीआय) अर्थात वस्तू व सेवाकर (जीएसटी) गुप्तचर महासंचालनालयाच्या केंद्रीय पथकाच्या नाशिक युनिटने तालुक्यातील पहूर कसबे येथे धाड टाकल्याची माहिती समोर आल्यानंतर प्रचंड खळबळ उडाली आहे. डीजीजीआयचे वरिष्ठ गुप्तचर अधिकारी ब्रिज भूषण त्रिपाठी यांच्या पथकाने बुधवारी ही धाड टाकली होती. दरम्यान, जीएसटी घोटाळ्याशी संबंधित हे धाडसत्र होते. त्यानुसार एका स्टील कंपनीच्या जीएसटीच्या पत्त्यावर चक्क मेडिकल सुरु असल्याचे आढळून आले होते. तर अन्य एकाला आपल्या नावावर स्टील कंपनी असल्याचे माहितच नव्हते. दरम्यान, याप्रकरणी डीजीजीआयच्या पथकाने दोघांना ताब्यात घेतले आहे. तर ज्यांच्या नावावर कंपनी दाखवली. त्यांना शांत डोक्याने यात गोवण्यात आल्याचे समोर आले आहे.
या प्रकरणात सर्वात धक्कादायक माहिती अशी समोर अशी आली आहे की, नौकरी लावून देण्याचे आमिष प्रवीण कुमावत या तरुणाला फसविण्यात आले. तर अशोक सखाराम सुरवाडे याला त्याच्या नावावर कंपनी असल्याचे माहीतच नव्हते. या दोन तरुणांप्रमाणे इतरांचे साधारण १३० बनावट खाती तयार करून साधारण १०० कोटीच्या घरात हा घोटाळा गेला असल्याची माहिती सूत्रांनी दिली आहे. तर दुसरीकडे कैलास कौतिक भारुडे याने अधिकाऱ्यांना सांगितले की, सुरेशचंद्र हुकुमचंद्र जाधवानी हा सर्व कटाचा मुख्यलाभार्थी तसेच मुख्यसूत्रधार आहे. तसेच पिंटू इटकर हा जाधवानी आणि ओम प्रकाश सचदेव यांच्या सुचनेनुसार सर्व काम करत होता. तसेच जळगावला ज्या रॉयल फायनान्स कंपनीत नौकरी मागायला गेला होतो. ती फायनान्स कंपनी जाधवानी याची होती, अशी माहिती प्रवीण कुमावत यांनी दिली आहे. यावरून मुख्य सूत्रधार जाधवानी असल्याचे बोलले जात आहे. दरम्यान, या गुन्ह्याची व्याप्ती यवतमाळ, नंदुरबारसह राज्यातील इतर जिल्ह्यातही असल्याचे कळते.
