जळगाव (प्रतिनिधी) जळगाव जिल्हा दूध संघाची दोन दिवसापूर्वी स्थगित झालेली निवडणूक प्रक्रिया वेळेवर होण्याची शक्यता वर्तवली जात आहे. आमदार मंगेश चव्हाण यासाठी प्रयत्नशील असून त्यांनी मुख्यमंत्री आणि उपमुख्यमंत्र्यांची भेट घेतल्याचे कळते.
राज्यात ग्रामपंचायत निवडणुका जाहीर झाल्या आहेत. तसेच सहकारी संस्थांच्याही निवडणुका आहेत. दोन्हीचे कार्यक्षेत्र ग्रामीण भाग असल्याने अनेक मतदार मतदानापासून वंचित राहण्याची शक्यता लक्षात घेता जळगाव जिल्हा दूध संघाच्या संचालकपदाच्या निवडणुकांची प्रक्रिया शासनाने स्थगित केली होती. तसेच नवीन प्रक्रिया २० डिसेंबर नंतर सुरु होणार होती. परंतू सूत्रांनी दिलेल्या माहितीनुसार आमदार मंगेश चव्हाण यासाठी प्रयत्नशील असून त्यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांची भेट घेतल्याचे कळते. जळगाव जिल्ह्यात चोपडा तालुक्यात ११, तर यावल तालुक्यात २ अशा एकूण १३ ग्रामपंचायतींची निवडणूका सप्टेंबर महिन्यात होवून गेल्या आहेत. आता आता काही मोजक्याच ग्रामपंचायतींच्या निवडणुका आहेत. त्यामुळे दुध संघाची निवडणूक वेळेवर घ्यावी, अशी विनंती आमदार मंगेश चव्हाण यांनी मुख्यमंत्री आणि उपमुख्यमंत्र्यांकडे केल्याचे कळते. त्यानुसार आज सायंकाळपर्यंत याबाबतचे आदेश येऊ शकतात, अशी चर्चा आहे. तसेच जे दोन-तीन दिवस प्रचाराचे वाया गेले आहेत. ते दिवस वाढवून देण्यात येण्याची शक्यता आहे. तसे झाल्यास निवडणूक १० तारखेच्या ऐवजी १२ किंवा १३ तारखेला जाहीर होण्याची बोलले जात आहे.
