जळगाव (प्रतिनिधी) उपमुख्यमंत्री अजित पवार यांचे अत्यंत निकटवर्तीय मानले जाणारे संजय पवार यांची जळगाव राष्ट्रवादीच्या जिल्हाध्यक्षपदी नियुक्ती करण्यात आली आहे. प्रदेशाध्यक्ष सुनील तटकरे यांच्या हस्ते त्यांना आज नियुक्तीचे पत्र देण्यात आले. दरम्यान, आजच्या या घटनेचे विशेष महत्व म्हणजे ४० वर्षापूर्वी संजय पवार यांचे वडील स्व. माजी आमदार मुरलीधर आण्णा पवार यांच्यावर देखील शरद पवार यांनी जिल्हाध्यक्षपदाची जबाबदारी दिली होती.
जिल्हाबँकेचे चेअरमन तथा उपमुख्यमंत्री अजित पवार यांचे कट्टर समर्थक मानले जाणारे संजय पवार यांची जळगाव राष्ट्रवादीच्या जिल्हाध्यक्षपदी नियुक्ती करण्यात आली आहे. प्रदेशाध्यक्ष सुनील तटकरे यांच्या हस्ते त्यांना आज नियुक्तीचे पत्र देण्यात आले. तर जळगाव शहर महानगर अध्यक्षपदी अभिषेक पाटील यांची नियुक्ती करण्यात आली आहे. यावेळी मंत्री धनंजय मुंडे, अनिल पाटील, भुसावळचे माजी नगराध्यक्ष उमेश नेमाडे यांच्यासह आदी पदाधिकारी उपस्थित होते.
जळगाव जिल्ह्यात ४० वर्षांनी पुन्हा इतिहासाची पुनरावृत्ती !
शरद पवार यांनी १९८५ या वर्षी स्व. माजी आमदार मुरलीधर आण्णा पवार यांच्यावर पक्षाची जिल्हाध्यक्षपदाची जबाबदारी सोपवली होती. तर २०२३ मध्ये उपमुख्यमंत्री अजितदादा पवार यांनी मुरलीधर अण्णांचे चिरंजीव तथा जिल्हा बँकेचे अध्यक्ष संजय पवार यांची जळगांव जिल्हा राष्ट्रवादी अध्यक्षपदी नियुक्ती केली आहे. यानिमित्ताने जळगाव जिल्ह्यात ४० वर्षांनी पुन्हा एकदा इतिहासाची पुनरावृत्ती झालीय, असेच चित्र निर्माण झाले आहे.
महाराष्ट्रात सध्या राजकीय घडामोडी खूप जोरात घडत आहे. अशातच राष्ट्रवादी काँग्रेस पक्षामध्ये दोन गट पडलेले आहेत. एक गट शरद पवारांचा व दुसरा गट अजितदादा पवारांचा. कालच ना.अजितदादा पवार हे जळगाव जिल्ह्यात ‘शासन आपल्या दारी’ या कार्यक्रमाच्या निमित्ताने जळगाव जिल्ह्यात येऊन गेले. त्यानंतर त्यांनी आज लगेचच मुंबई येथे संजय पवार यांना बोलावून घेत जिल्हा राष्ट्रवादी काँग्रेस पक्षाच्या जिल्हाध्यक्षपदी जबाबदारी सोपवली. यावेळी जळगाव शहर महानगर महानगर अध्यक्षपदी अभिषेक पाटील यांची निवड करण्यात आली.
विशेष म्हणजे असा योगायोग 1985 साली देखील झाला होता. त्यावेळी शरद पवार साहेबांनी समाजवादी काँग्रेस पक्षाची स्थापना केली होती आणि त्यावेळी समाजवादी काँग्रेस पक्षाची धुरा ही स्वर्गीय मुरलीधरअण्णा पवार यांच्याकडे सोपवली होती. त्यावेळी स्व. मुरलीधरअण्णा पवार यांनी यांनी संपूर्ण जळगाव जिल्ह्यात शरद पवार साहेबांच्या सोबत संघटन बांधण्यात खूप परिश्रम घेऊन संघटन बांधणी यशस्वीरित्या पूर्ण केली होती आणि जवळपास सात आमदार शरद पवार साहेबांच्या पाठीशी उभे केले होते. तसाच काहीसा प्रकार शरद पवार साहेब व अजितदादा पवार या दोन्ही गटांमध्ये जळगाव जिल्ह्यामध्ये राजकीय घटना घडत आहे.
ज्यावेळी मुरलीधर अण्णांनी संघटना सांभाळली होती. तर आता उपमुख्यमंत्री अजितदादा पवार यांच्यासोबत संजय पवार हे ही जबाबदारी सांभाळणार आहेत. एकूणच सहकार क्षेत्रामध्ये असलेली पकड व संघटन जोडणीमध्ये असलेली क्षमता याचा विचार करता पक्षाने संजय पवार यांच्यावर ही जबाबदारी टाकली आहे. राष्ट्रवादी काँग्रेस पक्षाचे प्रदेशाध्यक्ष खासदार सुनील तटकरे यांच्या हस्ते संजय पवार यांना आज पत्र देण्यात आले.
या प्रसंगी मंत्री अनिल पाटील, धनंजय मुंडे, आमदार विक्रमजी काळे, महाराष्ट्र प्रदेश युवक काँग्रेसचे अध्यक्ष सूरजजी चव्हाण, प्रदेश सरचिटणीस शिवाजीराव गरजे, उमेश नेमाडे, रवींद्रनाना पाटील, माजी युवक अध्यक्ष सुनील पाटील, डॉ. पी.एस. पाटील, गौरव लवंगे हे उपस्थित होते. या निवडीचे प्रदेशाध्यक्ष खासदार सुनीलजी तटकरे उपमुख्यमंत्री नामदार अजित दादा पवार यांनी अभिनंदन केले आहे.
जिल्हाध्यक्ष पद शोभेचे पद म्हणून ठेवणार नाही. घराघरात राष्ट्रवादीचा विचार पोहचवण्याचा शंभर टक्के प्रयत्न करेल. खरं म्हणजे आज माझ्यासाठी खूप भावनिक दिवस आहे. माझ्या वडिलानंतर पुन्हा एकदा बारामतीच्या पवार परिवाराने चांदसरच्या पवार परिवारावर विश्वास दाखवला आहे. पक्षाचा विश्वास पुन्हा एकदा जळगाव जिल्ह्यात सार्थ ठरविण्यासाठी प्रामाणिक प्रयत्न करेल – संजय पवार (जिल्हाध्यक्ष, राष्ट्रवादी, अजित पवार गट )
