मुंबई (वृत्तसंस्था) मार्डच्या (MARD) संपावर तोडगा काढण्यात भाजपचे संकटमोचक तथा वैद्यकीय शिक्षणमंत्री गिरीश महाजन (Girish Mahajan) यांना अखेर यश आले आहे.
ना.गिरीश महाजन यांच्याबरोबर पार पडलेल्या बैठकीनंतर मार्डच्या डॉक्टरांनी संप मागे घेतल्याची माहिती गिरीश महाजन यांनी दिली आहे. संपावर (Strike) तोडगा काढण्यासाठी गिरीश महाजन यांच्या बंगल्यावर बैठक पार पडली. या बैठकीत मार्डच्या मागण्यांवर चर्चा करण्यात आली. निवासी डॉक्टरांच्या शिष्टमंडळासोबत सकारात्मक चर्चा झाल्यानंतर वैद्यकीय शिक्षण मंत्री गिरीश महाजन यांनी पत्रकार परिषदेला संबोधित केले.
यावेळी गिरीश महाजन यांनी सांगितले की, निवासी डॉक्टरांची कोणतीही गैरसोय होणार नाही याची आम्ही काळजी घेत आहोत अशी माहिती वैद्यकीय शिक्षण मंत्री गिरीश महाजन यांनी दिली. वसतिगृहसाठी आम्ही प्रयत्न करत आहोत असेही त्यांनी सांगितले. सकारात्मक आज आमची चर्चा डॉक्टरांसोबत झाली आहे. त्यांनी आता संप मागे घेतला असल्याचे महाजन यांनी सांगितले. आंदोलन करण्यापूर्वी मला भेटा असं देखील मी त्यांना सांगितलं आहे. आधी भेट झाली असती तर हा प्रश्न निर्माण झाला नसता असेही गिरीश महाजन यांनी सांगितले.
मार्डच्या डॉक्टरांसाठी निवास व्यवस्था हा सर्वात मोठा मुद्द आहे. सध्या दहा हजार खोल्या आहेत, पण त्या कमी आहेत. ज्या आहेत त्यांची ही तातडीने डागडुजी करण्याची गरज आहे, अनेक ठिकाणी बाथरून गळतायत, अनेक ठिकाणी रुम दुरुस्त करणं आवश्यक आहे. काही ठिकाणी स्लॅब कोसळले आहेत. यासंदर्बात संबंधित विभाग आणि अधिकाऱ्यांना तातडीने डागडुजी करण्याच्या सूचना दिल्या आहेत. यासाठी बारा कोटी रुपये दिले आहेत. वसतिगृहासाठी केंद्र सरकारकडून 500 कोटींच्या निधी मागितला आहे. त्याशिवाय, सीएसआर अंतर्गत निधीची मागणी कॉर्पोरेट क्षेत्राकडे करण्यात आली आहे. त्यांनीदेखील सकारात्मक भूमिका दर्शवली आहे. दोन दिवसांत एक हजार 432 पदे भरली जाणार आहे. या भरतीचा प्रस्ताव याआधीच होता. त्याला अधिक गती येणार असल्याचे गिरीश महाजन यांनी म्हटले. महापालिका अखत्यारीत असलेल्या रुग्णालयातील निवासी डॉक्टरांच्या प्रश्नांबाबत मुख्यमंत्र्याकडे याची चर्चा करणार असल्याची माहिती गिरीश महाजन यांनी दिली.
