कोलकाता (वृत्तसंस्था) जेव्हा पश्चिम बंगालमध्ये विधानसभेचे निकाल लागतील तेव्हा भाजपा २०० च्या बहुमताने सरकार स्थापन करेल, असा विश्वास केंद्रीय मंत्री अमित शहा यांनी व्यक्त केला. आज ममता बॅनर्जी यांच्या सरकारला जोरदार धक्के देण्यात आले आहेत. मुख्यमंत्री ममता बॅनर्जी यांचा ‘योद्धा’ अशी ओळख असलेले माजी मंत्री सुवेंदू अधिकारी यांनी आज भाजपमध्ये प्रवेश केला.
केंद्रीय गृहमंत्री अमित शहा दोन दिवसांच्या पश्चिम बंगाल दौऱ्यावर शुक्रवारी रात्रीच दाखल झाले असून आज मेदिनीपूर येथील सभेद्वारे त्यांनी तृणमूल काँग्रेसला तगडा झटका दिला आहे. मुख्यमंत्री ममता बॅनर्जी यांचा ‘योद्धा’ अशी ओळख असलेले माजी मंत्री सुवेंदू अधिकारी यांनी आज भाजपमध्ये प्रवेश केला. व्यासपीठावर अमित शहा यांच्या बाजूलाच त्यांना स्थान देण्यात आलं होतं. सुवेंदू यांच्यासह पश्चिम बंगालमधील ९ विद्यमान आमदार भाजपात सहभागी झाले असून त्यात तृणमूलच्या ५ आमदारांचा समावेश आहे. विधानसभा निवडणुकांच्या तोंडावर पश्चिम बंगालमध्ये राजकारण चांगलंच तापलं आहे. ममता बॅनर्जी विरुद्ध भाजप या संघर्षाला अधिकच धार चढताना दिसत आहे. भाजपचे राष्ट्रीय अध्यक्ष जे. पी. नड्डा यांच्या ताफ्यावर झालेल्या हल्ल्याच्या पार्श्वभूमीवर केंद्रीय गृहमंत्री अमित शहा यांचा पश्चिम बंगाल दौरा लक्षवेधी ठरला आहे. या दौऱ्याकडे सर्वांचेच लक्ष लागले आहे. अपेक्षेनुसार शहा यांनी ममतांना या दौऱ्यात एकाचवेळी अनेक धक्के दिले आहेत. मेदिनीपूर येथे आयोजित करण्यात आलेल्या सभेला मोठी गर्दी झाल्याचे पाहायला मिळाले. याच सभेत सुवेंदू अधिकारी यांच्यासह तृणमूलचे अनेक प्रमुख नेते भाजपात सहभागी झाले असून भाजपला त्यामुळे अधिकच बळ मिळालं आहे. ममतांचा विजयी रथ रोखण्यासाठी भाजप जोरदार रणनीती आखत आहे. त्यामुळेच अमित शहा आणि पंतप्रधान नरेंद्र मोदी यांनी या राज्याकडे आपलं लक्ष वळवलं आहे. शहा यांनी आजच्या सभेत बोलताना पश्चिम बंगाल जिंकण्याचं आपलं स्वप्न अगदी स्पष्टच शब्दांत बोलून दाखवलं. प. बंगाल विधानसभा निवडणुकीचे जेव्हा निकाल लागतील तेव्हा २०० पेक्षा अधिक जागा जिंकून भाजप येथे सरकार स्थापण्यासाठी सज्ज झालेला असेल, असा विश्वास शहा यांनी यावेळी बोलून दाखवला. काँग्रेसला तुम्ही तीन दशके दिली. २७ वर्षे येथे कम्युनिस्टांनी राज्य केलं. गेली दहा वर्षे येथे ममता दिदींची सत्ता आहे. आता तुम्ही भाजपच्या हाती पाच वर्षे सत्ता द्या. आम्ही पश्चिम बंगालला खऱ्या अर्थाने ‘सोनार बांगला’ करून दाखवू, असे शहा म्हणाले.
