पाचोरा (प्रतिनिधी) लोकांनी भारतीय जनता पक्षाला मोठ्या अपेक्षेने दोनदा सत्ता सोपवून देखील कोणतीही कामे झाली नाहीत. सर्वसामान्य लोक देशोधडीला लागले असून याचमुळे आता भाजपचा पराभव अटळ असल्याचे प्रतिपादन महाविकास आघाडीचे जळगावातील उमेदवार करण बाळासाहेब पाटील यांनी केले. ते पाचोरा तालुक्यातील प्रचाराच्या दरम्यान मतदारांशी संवाद साधत होते.
पाचोरा तालुक्यात करण पवार यांच्या प्रचार फेर्‍या सुरू असून याचे अतिशय चोख नियोजन शिवसेना-उध्दव बाळासाहेब ठाकरे पक्षाच्या ज्येष्ठ नेत्या वैशालीताई नरेंद्रसिंग सुर्यवंशी आणि त्यांच्या सहकार्‍यांनी केले आहे. सोमवारी सायंकाळच्या सत्रामध्ये करण पाटील आणि महाविकास आघाडीच्या पदाधिकार्‍यांनी शिंदाळ, वाडी-शेवाळे येथे प्रचार फेर्‍या काढल्यानंतर खडकदेवळा येथील प्राचीन महादेव मंदिरात वंदन करून उपस्थितांशी संवाद साधला. याप्रसंगी बोलतांना करण पाटील यांनी भाजपवर जोरदार टिका करतांना मतदारसंघातील विविध कामांना गती देण्यासाठी आपल्याला विजयी करण्याचे आवाहन केले. तर शिवसेना-उध्दव बाळासाहेब ठाकरे पक्षाच्या ज्येष्ठ नेत्या वैशालीताई सुर्यवंशी यांनी सर्वसामान्य लोकांमध्ये मोठी नाराजी असल्याचे नमूद करतांनाच आमचे ठिकठिकाणी उत्स्फुर्त स्वागत होत असून लोकांचे हे प्रेम भारावून टाकणार असल्याचे सांगितले.
प्रचार फेरीत शिवसेना-उध्दव बाळासाहेब ठाकरे, राष्ट्रवादी कॉंग्रेस पक्ष-शरदचंद्र पवार, भारतीय राष्ट्रीय कॉंग्रेस, आम आदमी पक्ष आणि मित्रपक्षांच्या आघाडीतील विविध नेते, पदाधिकारी आणि कार्यकर्ते मोठ्या संख्येने सहभागी झाले होते.
