जळगाव (प्रतिनिधी) – राज्याच्या प्रगतीला पाठबळ देणाऱ्या आणि अंधाराकडून प्रकाशाकडे नेणाऱ्या महावितरणच्या सर्व अभियंत्यांच्या अहोरात्र सेवेचा, कष्टाचा आणि तांत्रिक कौशल्याचा मंगळवारी जळगाव परिमंडलात यथोचित सन्मान करण्यात आला. निमित्त होते भारतरत्न डॉ. मोक्षगुंडम विश्वेश्वरैया यांच्या जयंतीनिमित्त आयोजित राष्ट्रीय अभियंता दिनाचे.
मुख्य अभियंता आय. ए. मुलाणी यांनी कार्यक्रमाचे अध्यक्षस्थान भूषविले. कार्यक्रमास सेवानिवृत्त मुख्य अभियंता (जलसिंचन) व्ही. डी. पाटील, जळगाव मंडलाचे अधीक्षक अभियंता मदन सांगळे प्रमुख अतिथी म्हणून उपस्थित होते.
याप्रसंगी महावितरणचे संचालक (मानव संसाधन) राजेंद्र पवार यांनी व्हीसीद्वारे परिमंडलातील अभियंत्यांशी संवाद साधून त्यांना शुभेच्छा दिल्या. कोणत्याही आणीबाणीच्या काळात अहोरात्र कार्य करणाऱ्या महावितरणच्या अभियंत्यांचा मला सार्थ अभिमान आहे, असे पवार म्हणाले. अभियंत्यांनी सामाजिक बांधिलकी जोपासत शाळा-महाविद्यालयांत जाऊन वीज सुरक्षा, हरित ऊर्जा आणि वीज बचतीबाबत सुरू केलेल्या प्रबोधन अभियानाचे त्यांनी विशेष कौतुक केले.
अध्यक्षीय भाषणात मुख्य अभियंता आय.ए. मुलाणी यांनी अभियंत्यांना नवनवीन येऊ घातलेले तंत्रज्ञान अंगीकृत करण्याचे आवाहन केले. या तंत्रज्ञानाचा वापर महावितरणच्या प्रगतीसाठी आणि ग्राहक सेवा अधिक सक्षम करण्यासाठी करण्यात यावा, असे ते म्हणाले. तसेच महावितरणतर्फे राबवल्या जाणाऱ्या विविध लोकोपयोगी योजनांचा लाभ शेवटच्या ग्राहकापर्यंत पोहोचवण्याचे काम अभियंत्यांनी निष्ठेने करावे, असे निर्देश त्यांनी दिले.
हल्लीच्या धावपळीच्या आणि जबाबदारीच्या काळात अभियंत्यांवरील मानसिक ताणतणाव कमी करण्यासाठी कार्यक्रमात विशेष सत्राचे आयोजन करण्यात आले होते. ‘आर्ट ऑफ लिव्हिंग’च्या संचिती सदुरकर यांनी स्ट्रेस मॅनेजमेंटविषयी उपयुक्त माहिती दिली. कार्यक्रमास परिमंडलातील कार्यकारी अभियंत्यांसह मोठ्या संख्येने अभियंते उपस्थित होते.
