अहमदनगर (वृत्तसंस्था) नगर अर्बन बँकेत तीन कोटीचा अपहार केल्याप्रकरणी भाजप नेते माजी खासदार दिलीप गांधी, घनश्याम अच्युत बल्लाळ, आशुतोष सतिष लांडगे यांच्यासह बँकेच्या तत्कालीन संचालक मंडळाच्या सदस्यांवर कोतवाली पोलीस ठाण्यात गुन्हा दाखल झाला आहे.
याबाबतची फिर्याद शाखा अधिकारी मारूती रंगनाथ औटी (वय ४५, रा. पाईपालाईन रोड, अहमदनगर) यांनी दिली. त्यानुसार अहमदनगरच्या कोतवाली पोलिस ठाण्यात हा गुन्हा दाखल करण्यात आलाय. दिलीप गांधी यांच्यासह बँकेच्या तत्कालीन पदाधिकाऱ्यांनी संगनमताने कट रचून बँकेची ३ कोटी रूपयांची फसवणूक केल्याप्रकरणी हा गुन्हा दाखल करण्यात आला आहे. भाजपचे माजी खासदार दिलीप गांधी यांच्यावर फसवणूकीचा गुन्हा दाखल झाल्याने बँकिंग क्षेत्रात मोठी खळबळ उडाली आहे.
७ ऑक्टोबर २०१७ ते १० डिसेंबर २०२० या दरम्यान बँकेचे माजी चेअरमन दिलीप मनसुखलाल गांधी, मुख्य शाखेचे तत्कालीन शाखाधिकारी घनश्याम अच्युत बल्लाळ, कर्जदार आशुतोष सतिश लांडगे आणि संचालक मंडळ सदस्य यांनी कट रचून, संगनमत करुन, बँकेस खोटे कागदपत्र तयार करुन बँकेच्या तीन कोटी रूपयांच्या रकमेचा अपहार करून ठेवीदार, सभासद यांचा विश्वासघात केला आहे. सदर ३ कोटी रूपयांची रक्कम या आर. बी कासार, मे. देवी एजन्सी व मे. गिरीराल एंटरप्राइजेस, संगमनेर यांच्या खात्यात वर्ग करुन त्यांच्या खात्याद्वारे काढून घेवून बँकेच्या ३ कोटी रूपयांची फसवणूक केली आहे. नगर अर्बन बँक घोटाळ्यामुळे चर्चेत आली आहे. बँकेत कोट्यवधीचा अपहार झाला असून त्याची चौकशी करून गुन्हा दाखल करावा, अशी मागणी सातत्याने बँकेच्या काही सभासदांकडून करण्यात येत होती. त्यासाठी विविध प्रशासकीय यंत्रणांकडे हे सभासद पाठपुरावा करीत होते. त्यातच आज बँकेचे सभासद राजेंद्र गांधी यांच्यासह पोपट लोढा, बहिरनाथ वाकळे, मनोज गुंदेचा, अनिल गटणी, रवींद्र सुराणा, ऋषिकेश आगरकर आदींनी बँकेचे प्रशासक यांच्या दालनामध्ये आंदोलन केले. गुन्हा दाखल झाल्याशिवाय आम्ही दालनातून उठणार नाही, अशी भूमिका या आंदोलकांनी घेतली. त्यानंतर बँकेचे प्रशासक एस. सी. मिश्रा यांनी कोट्यवधीचा अपहार केल्याप्रकरणी दोषी असणाऱ्यांविरुद्ध पोलिसांत तक्रार करण्याचे आदेश देऊन त्यासाठी बँकेचे शाखा अधिकारी मारुती औटी यांना प्राधिकृत केले. त्यानंतर औटी यांनी कोतवाली पोलीस ठाण्यात जाऊन फिर्याद दिली आहे.
आरोपींनी स्वत:च्या अधिकाराचा गैरवापर करुन अवास्तव व खोटे कर्ज मंजूर केलेले आहे. त्याद्वारे बँकेच्या रकमेची चोरी, अफरातर व फसवणूक केल्याप्रकरणी भादवी कलाम ४०६, ४२०, ४६५, ४६७, ४७१ व १२० ब प्रमाणे सर्व आरोपींविरोधात गुन्हा दाखल करण्यात आला आहे. दरम्यान या प्रकरणाची चौकशी आता कोतवाली पोलीस करत आहे. नगर अर्बन बँकेवर प्रशासक देखील नेमण्यात आला होता. आणि आता भाजपचे माजी खासदार दिलीप गांधी यांच्यासह बँकेच्या तत्कालीन पदाधिकाऱ्यांवर गुन्हा दाखल झाल्याने अहमदनगर जिल्ह्यात एकाच खळबळ उडाली आहे.
