जळगाव (प्रतिनिधी) भुसावळमध्ये भाजपला मोठा झटका बसला आहे. भाजपच्या २१ नगरसेवकांचा राष्ट्रवादीत प्रवेश केला आहे. अजित पवार यांच्या उपस्थितीत नगरसेवकांनी हाती घड्याळ बांधलं आहे. त्यामुळे पुन्हा एकदा एकनाथ खडसे यांनी भाजपला जोरदार धक्का दिला
भुसावळ येथील भाजपचे नगराध्यक्ष रमण भोळे यांच्यासह २१ नगरसेवक, सावदा पालिकेच्या नगराध्यक्षा अनिता येवले यांच्यासह ८ नगरसेवक तर फैजपूर पालिकेतील नगरसेवक हेमराज पाटील यांनी पत्नी माजी नगराध्यक्षा अमिता चौधरी यांच्यासह अनेक पदाधिकाऱ्यांनी राज्याचे उपमुख्यमंत्री आणि राष्ट्रवादीचे नेते अजित पवार यांच्या उपस्थितीत राष्ट्रवादीचा झेंडा हाती घेतला. ज्येष्ठ नेते एकनाथ खडसे यांनी भाजपमधून राष्ट्रवादीत प्रवेश केल्यानंतर उत्तर महाराष्ट्रात मोठ्या राजकीय घडामोडी घडणार, असा अंदाज व्यक्त केला जात होता. अशातच अनेक नगरसेवकांना राष्ट्रवादीत घेत खडसे यांनी भाजपला धक्का दिला आहे. हा प्रवेश सोहळा भुसावळ शहरात राष्ट्रवादीच्या मेळाव्यात आज शुक्रवारी पार पडला.
जळगाव जिल्ह्यात आज उपमुख्यमंत्री अजित पवार यांचा दौरा झाला. भुसावळ इथं सरदार वल्लभभाई पटेल यांच्या पुतळ्याचे अनावरण तसंच विविध विकासकामांचा उद्घाटन सोहळा आयोजित करण्यात आला होता. त्यानतंर आंबेडकर मैदानावर राष्ट्रवादी काँग्रेसच्या मेळाव्यात भाजपच्या अनेक नगरसेवकांनी राष्ट्रवादी काँग्रेसमध्ये प्रवेश केला. या मेळाव्याप्रसंगी माजी मंत्री एकनाथ खडसे, जिल्हा बँकेचे अध्यक्ष गुलाबराव देवकर, जिल्हाध्यक्ष अॅड. रवींद्र पाटील, महानगराध्यक्ष अशोक लाडवंजारी, आमदार अनिल भाईदास पाटील, माजी आमदार संतोष चौधरी, माजी आमदार कैलास पाटील, डॉ. सतीश पाटील, मनीष जैन, रोहिणी खडसे आदी मान्यवरांची उपस्थिती होती.
