एरंडोल (प्रतिनिधी) फेब्रुवारी 2026 रोजी सायंकाळी ठीक 5.00 वाजता भारतीय जनता पार्टी एरंडोल मंडळातर्फे हर्षवर्धन सपकाळ यांच्या वक्तव्याचा तीव्र निषेध नोंदवण्यात आला. एरंडोल येथे झालेल्या या आंदोलनात पदाधिकारी व कार्यकर्त्यांनी मोठ्या संख्येने सहभाग घेतला.
छत्रपती शिवाजी महाराज आणि टिपू सुलतान यांची तुलना करून त्यांना समकक्ष ठरवण्याचा प्रकार हा दुर्दैवी व आक्षेपार्ह असल्याचा आरोप यावेळी करण्यात आला. आंदोलनकर्त्यांनी म्हटले की, हे विधान केवळ ऐतिहासिक अज्ञान दर्शवणारे नसून महाराष्ट्राच्या अस्मितेवर थेट घाला घालणारे आहे. छत्रपती शिवाजी महाराजांची तुलना जबरदस्तीने धर्मांध राजवटीचे प्रतिनिधित्व करणाऱ्या टिपू सुलतानशी करणे म्हणजे इतिहासाचा अपमान असल्याची भावना व्यक्त करण्यात आली.
या आंदोलनात माजी जिल्हा परिषद सदस्य नानाभाऊ पोपट महाजन, प्रदेश सदस्य सुनील भैया पाटील, जिल्हा उपाध्यक्ष एस. आर. पाटील, मंडळाध्यक्ष योगेश युवराज महाजन, सरचिटणीस अमरजितसिंग पाटील, तसेच एडवोकेट मधूकर देशमुख, सचिन विसपुते, पिंटू राजपूत, राहुल बडगुजर, आनंदा चौधरी (भगत), प्रमोद महाजन, बाजीराव पांढरे, मयूर ठाकूर, पिंटू राजपूत (पिंपळकोठा), रवींद्र चौधरी, मोतीलाल पाटील व अन्य पदाधिकारी व कार्यकर्ते उपस्थित होते.
काँग्रेसच्या प्रदेशाध्यक्षांनी केलेल्या या विधानाबद्दल राज्यभरातून तीव्र संताप व्यक्त होत असून, अशा व्यक्तीला महाराष्ट्रात राहण्याचा नैतिक अधिकार नाही, अशी भावना यावेळी मांडण्यात आली. केवळ माफी नव्हे तर काँग्रेस पक्षाने त्यांच्यावर तात्काळ कारवाई करून बडतर्फ करावे, अशी मागणी भाजप एरंडोल मंडळाकडून करण्यात आली.
दरम्यान, आंदोलनादरम्यान हर्षवर्धन सपकाळ यांच्या प्रतिकात्मक प्रतिमेला जोडेमार करून ती जाळण्यात आली तसेच घोषणाबाजी करत निषेध व्यक्त करण्यात आला.
