मुंबई (वृत्तसंस्था) अभिनेत्री कंगना रणौतच्या घराचा आणि ऑफिसवर कारवाई केल्यानंतर आता बीएमसीने सोनू सूदकडे आपला मोर्चा वळवला आहे. मुंबई महापालिकेने सोनू सूदवर आरोप लावला आहे की, त्याने जुहू येथील ६ मजली रहिवासी इमारतीत कोणत्याही परवानगीशिवाय हॉटेल सुरू केलं आहे. त्यामुळे सोनू सूदवर महाराष्ट्र राज्य शहर नियोजन(MRTP) कायद्याखाली बेकायदेशीर बदल केल्याप्रकरणी गुन्हा दाखल करण्याची मागणी बीएमसीने केली आहे.
बीएमसीने आरोपांमध्ये म्हटलं आहे की, ‘जुहूच्या ज्या परिसरात सोनू सूदची ६ मजली इमारत आहे तो रहिवासी भाग आहे. अभिनेता सोनू सूदने कोणत्याही परवानगीशिवाय तिथे हॉटेल सुरू केलं आहे तसंच या इमारतीमध्ये अवैधरित्या काही बदल केले आहेत. याबद्दल बीएमसीने सोनू सूदला नोटीसही पाठवली होती.’ मात्र सोनू सूदने याबाबत नकार दिला आहे. आपल्याला बीएमसीकडून परवानगी मिळाली असून महाराष्ट्र कोस्टल झोन मॅनेजमेंटकडून परवानगी मिळणे बाकी आहे असं सोनू सूदने म्हटलं आहे. मात्र मी यापूर्वीच बीएमसीकडून योग्य ती परवानगी घेतली आहे. फक्त महाराष्ट्र कोस्टल झोन मेनेजमेंटच्या परवानगीचा विषय आहे. कोविड १९ च्या संकटामुळे ही परवानगी मिळण्यास उशीर झाला आहे. कोणतंही बेकायदेशीरपणे बांधकामात बदल झाला नाही, हे हॉटेल कोविड योद्धांना संकटकाळात राहण्यासाठी दिलं होतं. जर परवानगी नसेल तर मी पुन्हा हॉटेलचं रहिवाशी बांधकामात रूपांतर करतो, बीएमसीच्या तक्रारीविरोधात लवकरच मुंबई हायकोर्टात जाणार असल्याचं अभिनेता सोनू सूदने सांगितले.
कोरोना काळात बॉलिवूड अभिनेता सोनू सूदने केलेल्या कामाची सर्वत्र चर्चा आहे, लॉकडाऊनमध्ये सोनू सूदने अनेक गरीब मजुरांना त्यांच्या इच्छित स्थळी पोहचवण्यासाठी मदत केली, कोणाचं ऑपरेशन असो, शिक्षणासाठी पैसे असतील प्रत्येक गोष्टीत मदत करण्यासाठी सोनू सूद आणि त्याची टीम पुढे सरसावली होती, ट्विटरवर समस्या मांडली आणि सोनू सूदला टॅग केलं की हमखास त्याच्या टीमकडून समस्या सोडवण्यासाठी प्रयत्न झाले. सोनू सूदच्या या दर्यादिलीमुळे त्याच्या चाहत्यांच्या संख्येत प्रचंड वाढ झाली, याच काळात सोनू सूदच्या मदत कार्यावर अनेकांनी प्रश्नचिन्ह उपस्थित केले. सोनू सूदला मिळणारी आर्थिक रसद ही भाजपाकडून होतेय असा दावाही काहींनी केला होता. शिवसेनेनेही सोनू सूदला या कामगिरीवर आक्षेप घेतले होते, त्यावरून भाजपाने शिवसेना आणि मुख्यमंत्री उद्धव ठाकरेंवर टीकास्त्र सोडलं होतं.
