बोदवड (महेंद्र पाटील) येथील बोदवड कृषि उत्पन्न बाजार समितीची निवडणूक होणार की नाही, ही शंका असतांना जाहीर झालेल्या स्थगिती पत्रकाप्रमाणे कोणतेही अधिकृत पत्र प्राप्त न झाल्याने निवडणूक कार्यक्रम सुरू राहिला. दरम्यान, आज २० एप्रिल रोजी उमेदवारांची माघारीचा अंतिम दिवस आहे. त्यामुळे आघाडी, युती की स्वतंत्र पॅनल?, याचे चित्र आज सायंकाळी स्पष्ट होणार आहे.
सर्वच राजकीय पक्षाच्या नेत्यांनी अर्ज दाखल करतांनाच माघारअर्जावर स्वाक्षऱ्या घेऊन ठेवल्या होत्या. मात्र, काही उमेदवारांनी स्वतंत्र अर्ज भरल्याने त्यांची मनधरणी काल रात्रीपर्यंत सुरू होती. काही उमेदवारांना घेऊन मुक्ताईनगर येथे नेत चर्चा करण्यात आल्या. कालपर्यंत कोणत्याही पक्षाचे आघाडी व युती बाबत अधिकृत घोषणा झालेली नव्हती. शिवसेना शिंदे गट व भाजप यांची युती होण्याची शक्यता कार्यकर्ते बोलून दाखवत होते. मात्र, महाविकास आघाडीत मात्र संभ्रम आहे. कारण आमदार एकनाथराव खडसे यांचे नेतृत्वाखाली राष्ट्रवादीने मेळावे घेऊन प्रचाराचे नारळ आधीच फोडले आहे. त्यावेळी काँग्रेस, शिवसेना (ठाकरे गट) यांचे पदाधिकारी दिसले नव्हते.
महाविकास आघाडीची स्थिती आमदार खडसे यांच्यामुळेअसल्याने स्वतंत्र निवडणूक लढवावी अशी काही कार्यकर्त्यांची मानसिकता दिसली. त्यामुळे जास्त कार्यकर्त्यांना संधी मिळेल हाही हेतू आहे. आज दुपारी तीन वाजेपर्यंत माघारीची वेळ आहे. त्यात दाखल १८६ उमेदवारी अर्जातील किती उमेदवार माघार घेतात? हे दुपारनंतरच समजेल. तसेच युती, आघाडी होते की नाही?, हे ही देखील सायंकाळीच स्पष्ट होईल. यावेळी निवडणूक चुरशीची तसेच नेत्यांच्या प्रतिष्ठेची होणार असल्याने शेवटच्या क्षणापर्यंत माघारनाट्य व संयुक्त पॅनल बाबत शक्यता चाचपल्या जातील असा अंदाज आहे.
