बोदवड (प्रतिनिधी) बोदवड नगरपंचायतीसाठी (Bodwad Nagar Panchayat election) झालेल्या मतदानाची मतमोजणी सुरु आहे. नगरपंचायतीच्या एकुण १७ जागासाठी मतदान झाले असून यापैकी पहिल्या बारा जागांचे निकाल जाहीर करण्यात आले आहे. यात एकनाथ खडसेंना धक्का असून राष्ट्रवादीला (NCP) ७, शिवसेनेला (Shiv Sena) ९ जागा मिळाल्या आहेत. तर भाजपला (BJP) आतपर्यंत एका ठिकाणी विजय मिळाला आहे.
बोदवड नगरपंचायतीसाठी सुरू असलेल्या मतदानाची मोजणी आज सकाळी दहा वाजेपासून प्रारंभ झाली. पहिल्या फेरीपासून राष्ट्रवादी कॉंग्रेसने आघाडी ठेवली होती. बोदवडमध्ये सत्ता असलेल्या भाजपला मात्र केवळ खाते उघडता आले आहे. मात्र मुक्ताईनगर मतदार संघ असलेल्या चंद्रकांत पाटील यांच्या उमेदवारांनी नंतरच्या फेरींमध्ये बाजी पलवली. यात राष्ट्रवादीला मागे टाकत शिवसेना पुढे गेली आहे.
चंद्रकांत पाटलांकडून खडसेंना धोबीपछाड
बोदवड नगरपंचायतीच्या आत्तापर्यंत हाती आलेल्या निकालानुसार १७ पैकी राष्ट्रवादीला केवळ ८ जागांवर विजय मिळविता आला आहे. विशेष म्हणजे राष्ट्रवादीने १७ पैकी १७ जागांवर आपले उमेदवार उभे केले होते. परंतु, शिवसेनेने आतापर्यंतच्या निकालात मुसंडी मारल्याने एकनाथ खडसेंना त्यांच्याच होम ग्राउंडवर धक्का बसल्याचे चित्र सध्यातरी आहे.
प्रभाग क्रमांक १ मधुन शिवसेनेच्या रेखा सोनू गायकवाड यांनी विजय मिळविला. त्यांना ४६६ मते मिळालीत तर त्यांनी राष्ट्रवादीच्या प्रमीला संजय वराडे (मते २७९) यांना पराभूत केले. तर उर्वरित उमेदवारांमध्ये भाजपच्या वैशाली योगेश कुलकर्णी (७३) मते आणि काँग्रेसचे कुसूम अशोक तायडे (२१ मते) यांचा समावेश आहे.
प्रभाग क्रमांक २ मधुन राष्ट्रवादीचे कडूसिंग पांडुरंग पाटील हे ३३७ मते मिळवून विजयी झाले आहेत. त्यांनी शिवसेनेच्या सचिन सुभाष देवकर (मते २३३) यांना पराभूत केले. तर याच प्रभागातून भाजपचे महेंद्र प्रभाकर पाटील यांना ७५ तर कॉंग्रेसचे अंकुश राजेंद्र अग्रवाल यांना ११ मते मिळालीत.
प्रभाग क्रमांक ३ मथुन राष्ट्रवादीच्या योगीता गोपाळ खेवलकर यांनी विजय मिळविला. त्यांना ४०५ मते मिळाली. तर शिवसेनेच्या सुजाता खेवल यांना ३८५ आणि भाजपच्या कविता जैन यांना १६४ मते मिळालीत.
प्रभाग क्रमांक ४ मधून राष्ट्रवादीचे सैयद सईदाबी रशीद या ५११ मते मिळवून विजयी झाल्या. त्यांनी शिवसेनेचे कुरेशी सलीमाबी शेख कलीम २११ मते यांना पराभूत केले.
प्रभाग क्रमांक ५ मधून गोपाळ बाबूराव गंगतीरे आणि भाजपचे विजय शिवराम बडगुजर यांना समसमान ३७४ मते मिळाल्याने ईश्वरचिठ्ठी काढण्यात आली. यात भाजपचे विजय शिवराम बडगुजर यांना विजयी घोषीत करण्यात आले.
प्रभाग क्रमांक ६ मध्ये शिवसेनेच्या पूजा प्रितेश जैन या ३०२ मते मिळवून विजयी झाल्या. त्यांनी राष्ट्रवादीच्या सरीता संदीप जैन (मते २९६) यांना पराभूत केले.
प्रभाग क्रमांक ७ मध्ये राष्ट्रवादीने विजय संपादन केला. येथून राष्ट्रवादी काँग्रेस पक्षाच्या पूजा संदीप पारधी यांनी २४४ मते मिळवून विजय मिळविला. तर येथून शिवसेनेचे उमेदवार संजू छगन गायकवाड यांना १८८ मते मिळाली.
प्रभाग क्रमांक ८ मध्येही राष्ट्रवादीला यश लाभले येथून शेख एकताबी शेख लतीफ या ४३१ मते मिळवून विजयी झाल्या. त्यांनी संदीप मधुकर गंगतिरे (मते ३१४) यांना पराभूत केले.
प्रभाग क्रमांक ९ मध्ये शिवसेनेचे उमेदवार आनंदा रामदास पाटील यांनी ४०६ मते मिळवून विजय संपादन केला. येथे राष्ट्रवादीचे उमेदवार नितीन चावदस वंजारी यांना १५५ मते मिळालीत.
प्रभाग क्रमांक १० मध्ये शिवसेनेच्या मनीषा कैलास बडगुजर यांनी विजय संपादन केला. त्यांनी रेखा कैलास चौधरी यांचा पराभव केला.
प्रभाग क्रमांक ११ शिवसेनेचे उमेदवार बेवी रमेश भोई यांनी ४३९ मते मिळवून विजय मिळविला. येथे भाजपचे उमेदवार दिशा नरेशकुमार आहुजा यांना ३११ मते मिळालीत.
प्रभाग क्रमांक १२ मध्ये सुध्दा शिवसेनेचे उमेदवार शारदा सुनील बोरसे यांनी ५५६ मते मिळवून विजय संपादन केला.
बोदवड नगरपंचायत
एकुण जागा-१७
भाजप- १
शिवसेना-९
काँग्रेस-०
राष्ट्रवादी-७
इतर(अपक्ष)-०