बीड (वृत्तसंस्था) परळी शहराजवळील वागबेट येथे मंगळवारी दुपारी बारा साडेबाराच्या वाजेच्या सुमारास एक दुर्दैवी अपघात घडला असून बोअरवेल मशीनच्या गाडीवर असलेल्या काही भाग उच्च दाबाच्या विद्युत तारांमध्ये अडकला त्यामुळे गाडीत वीजप्रवाह उतरल्यामुळे गाडीवर बसलेल्या सहा जणांपैकी दोघांचा जागीच होरपळून मृत्यू झाला. तर अन्य दोन मजूर जखमी झाले आहेत.
मृत्यू पावलेल्या मजुरांचे पार्थिव उपजिल्हा रुग्णालयात उत्तरिय तपासणीसाठी दाखल करण्यात आले आहे. दोन जखमींवर येथेच उपचार सुरू आहेत. ही दुर्दैवी घटना परळी तालुक्यातील वाघबेट येथे पाण्याचा बोअर घेण्यासाठी आलेल्या गाडी व त्यावरील मजुरांसोबत घडली. ओडिशा राज्यातील मजुरांसह बोअरवेल मशीन घेऊन सहा जणांचे एक पथक गावात आले होते.
या गावातील बोअरवेल पाडण्याचे काम संपल्यानंतर बोरवेलची ही गाडी मुख्य रस्त्यावर येते वेळी रस्त्यात वीजवाहक तारांना या गाडीचा संपर्क झाला. त्यामुळे विद्युत प्रवाह संपूर्ण लोखंडी पाईप असलेल्या या गाडीत उतरला. या गाडीमध्ये एकूण सहा मजूर बसलेले होते. त्यापैकी दोन मजुरांचा जागीच मृत्यू झाला तर अन्य दोन जण होरपळून जबर जखमी झाले आहेत.
बोअरवेल वरील हे सर्व मजूर ओडिशातील असून गोविंदा जबलसिंग गौड व संदीप डॉक्टर गौड अशी त्यांची नावे आहेत. अन्य दोन मजूर जखमी झाले असून त्यांच्यावर परळी येथे उपचार सुरू आहेत. दरम्यान या वाहनाच्या चालकाच्या निष्काळजीपणाने हा अपघात घडल्याचे बोलले जात आहे.
