धरणगाव (प्रतिनिधी) शहरातील एका भागात रुग्णांच्या जिवाशी खेळत धोकादायक पद्धतीने दवाखाना चालविणारा बोगस बंगाली डॉक्टर आरोग्य विभागाच्या रडारवर आहे. या बोगस डॉक्टरविरुद्ध तक्रारी प्रशासनाला प्राप्त झाल्या आहेत.
शहरातील संजय नगर भागात बोगस बंगाली डॉक्टरने अनेक दिवसापासून आपले बस्तान बसवलेले आहे. गरीब, अशिक्षित नागरिकांच्या जीवाशी खेळत आहे. तर यासंदर्भात आरोग्य विभागाकडून त्याच्यावर ठोस कारवाई करण्याच्या तयारीत असल्याचे कळते. वैद्यकीय शिक्षणाची नोंदणी अथवा परवाना नसतानासुद्धा हा बंगाली डॉक्टरकडून सर्रासपणे रुग्णांवर उपचार केले जात आहेत. थंडी तापाचा रुग्ण असल्यास त्याला आरामही पडतो. मात्र गंभीर आजाराचा रुग्ण असल्यास हा डॉक्टर पुढील उपचारासाठी पाठवून देत असल्याचे कळते. हा व्यवसाय करताना अंगलट येण्यासारखे काही प्रकरण घडल्यास ते बाहेरच्या बाहेर मिटविले जाते.
आरोग्य विभागाच्या जिल्हास्तरीय व तालुकास्तरीय समितीच्या माध्यमातून बोगस डॉक्टरांवर कारवाई केली जाते. काही ठिकाणी जिल्ह्यात कारवाई देखील झाली आहे. आता मात्र, ती कारवाई धरणगावात होणार असल्याची माहिती मिळत आहे. धरणगाव डॉक्टर आणि मेडिकल असोशिएशनने याबाबत धरणगाव तहसीलदार यांच्याकडे तक्रार दाखल केली आहे. त्यानुसार मागील काही दिवसापासून आरोग्य विभाग दोन-तीन वेळेस संबंधित ठिकाणी जाऊन आलेत. परंतू तो बोगस बंगाली डॉक्टर मिळून येत नाहीय.
