धरणगाव (प्रतिनिधी) परिसरातील भाविकांचे श्रद्धास्थान असलेले मरीआई मंदिराला धार्मिक पर्यटन स्थळाचा दर्जा प्राप्त झाला असून आता मंदिर परिसरात विकास कामे होणार आहेत.
या संदर्भात अधिक असे की, सुधारित प्रादेशिक पर्यटन विकास योजनेअंतर्गत उपलब्ध करुन देण्यात येणाऱ्या निधीतून विविध पर्यटन स्थळांच्या / धार्मिक पर्यटन स्थळांच्या ठिकाणी मुलभूत सोयी सुविधा (उदा. वाहनतळ, प्रसाधनगृहे, आसन व्यवस्था, पिण्याच्या पाण्याची सोय, उपाहारगृह, विद्युतीकरण इत्यादी) उपलब्ध करुन देण्यात येतात. राज्यातील ८१ पर्यटन स्थळी/धार्मिक पर्यटन स्थळी वरील मुलभूत सोयीसुविधांपैकी उपलब्ध जागेनुसार ज्या सुविधा निर्माण करणे शक्य होईल त्या सुविधा पर्यटन संचालनालयामार्फत प्रादेशिक पर्यटन विकास योजनेंतर्गत उपलब्ध करुन देण्याची बाब विचाराधीन होती.
याबाबत नुकताच शासन निर्णय घेण्यात आला असून प्रादेशिक पर्यटन विकास योजनेतर्गत राज्यातील ८१ पर्यटन स्थळी / धार्मिक पर्यटन स्थळी मुलभूत सोयी-सुविधा पर्यटन संचालनालयामार्फत निर्माण करण्यासाठी प्रत्येकी रुपये १०.०० लक्ष याप्रमाणे एकूण रुपये ८१०.०० लक्ष निधीस मान्यता देऊन संपूर्ण निधी वितरीत करण्यास याव्दारे मान्यता देण्यात आली आहे. धरणगावातील भाविकांनी मुख्यमंत्री एकनाथ शिंदे, पालकमंत्री गुलाबराव पाटील, खासदार उन्मेष पाटील यांचे आभार मानले आहेत.
