चाळीसगाव (प्रतिनिधी) शहरातील स्टेशन रोडवरील एका बँकेतून बाहेर पडलेल्या इसमाच्या दुचाकीला लावलेल्या पिशवीतील तीन लाख रुपयांची रोकड बाहेर चोरट्यांनी लंपास केली. ही घटना शनिवारी दुपारी १.५० वाजता घडली.
ओझर येथील राजेंद्र तान्हीराम वाणी (५७) यांनी बडोदा बँकेतून ३ लाखाची रक्कम काढली. बाहेर आल्यावर त्यांनी मोटारसायकलच्या मागील सीटच्या कडीला प्लॅस्टिक पिशवी लावली. काही वेळाने ही तीन लाख रुपये असलेली ही पिशवी लंपास झाल्याचे त्यांच्या लक्षात आले. दरम्यान या घटनेतील दोघे सीसीटीव्ही कॅमेऱ्यात कैद झाले आहेत. त्या दिशेने पोलिसांचा तपास सुरू झाला आहे.
या घटनेची माहिती कळताच पोलीस निरीक्षक संदीप पाटील व सहकारी घटनास्थळी दाखल झाले. बँकेच्या फुटेजमध्ये एक त्यांनी जण डोक्याला बागायतदार रूमाल बांधून मोटारसायकलवर बसलेला त्याचा दुसरा साथीदार पैशांची पिशवी घेवून मोटारसायकलवरुन पसार झाल्याचे आढळून आला.
दरम्यान, राजेंद्र वाणी यांच्या मुलाचा पुण्याला कॉम्प्युटरचा व्यवसाय आहे. मुलाला व्यवसायासाठी पैसे लागत असल्याने त्याला देण्यासाठी त्यांनी आपल्या पत्नीच्या दागिण्यांवर गोल्ड लोन काढून ती रक्कम बँकेतून काढली होती. नेमकी तीच रक्कम चोरट्यांनी लंपास केल्याने राजेंद्र वाणी यांना रडू कोसळले होते.
