जळगाव (प्रतिनिधी) विरोधी पक्षाच्या आमदाराच्या आशीर्वादाने भुसावळ येथील पोलिसांनी दडपलेले लैंगिक शोषण प्रकरण, त्यात सहभागी युवकांनी ड्रग्ज सेवन केलेले असणे, सदर भुसावळ येथील युवकांना एमडी ड्रग्ज विकणाऱ्यांचे ड्रग्स माफिया ललित पाटील (पानपाटील) याच्याशी असलेल्या संबंधांची चौकशी होणे तसेच ड्रग्स माफिया ललित पाटील (पानपाटील) प्रकरणाचे जळगाव चाळीसगाव कनेक्शन शोधण्याची मागणी एका पत्राद्वारे आमदार मंगेश चव्हाण यांनी गृहमंत्री देवेंद्र फडणवीस यांच्याकडे केल्यामुळे जिल्ह्यात एकच खळबळ उडाली आहे.
आमदार मंगेश चव्हाण यांनी गृहमंत्री देवेंद्र फडणवीस यांना दिलेल्या पत्रात म्हटले आहे की, गेल्या काही महिन्यांपूर्वी ड्रग्ज माफिया ललित पाटील (पानपाटील) याचा नाशिक येथील एमडी ड्रग्जचा कारखाना पोलिसांनी उध्वस्त केला होता व त्या प्रकरणाच्या अनुषंगाने राज्यभरात सदर ड्रग्ज प्रकरणाची पाळेमुळे शोधून काढत अनेकांना अटक देखील केली. राज्य सरकारची ही ड्रग्जविरोधी कारवाई कौतुकास्पद आहे.
या प्रकरणाच्या अनुषंगाने गेल्या महिन्याभरात विरोधी पक्षाच्या नेत्यांनी काही वक्तव्य केले असून सदर ललित पानपाटीलचे जळगाव व चाळीसगाव कनेक्शन असल्याचे आरोप केले होते. जळगाव जिल्ह्यातील व चाळीसगाव मतदारसंघाचा लोकप्रतिनिधी या नात्याने मी आपल्याला विनंती करतो की, सदर आरोपांच्या अनुषंगाने निष्पक्षपणे चौकशी करण्यात येऊन जळगाव, चाळीसगाव किंवा जे काही कनेक्शन ललित पाटील (पानपाटील) ड्रग्ज प्रकरणाशी असेल ते शोधण्यात यावे.
तसेच गेल्या महिनाभरापूर्वी भुसावळ येथे घडलेल्या एका तरुणीच्या लैंगिक छळाची गंभीर घटना जिल्ह्यातील विरोधी पक्षाच्या एका आमदाराच्या सांगण्यावरून पोलिसांनी तोडीपानी करून दडपून टाकण्यात आल्याची चर्चा जिल्हाभरात आहे. सदर अमानवीय अश्या घटनेतील युवकांनी एमडी ड्रग्जच्या नशेत आपण हे कृत्य केल्याचे पोलिसांच्या जवळ खाजगीत मान्य केले होते.
याबाबत पोलिसांनी सदर एमडी ड्रग्ज कुणाजवळून घेतले याबाबत विचारले असता त्यांनी भुसावळ शहरातील तीन ते चार व्यक्तींची नावे घेतली होती. या सर्व व्यक्ती हे विरोधी पक्षाचे एक आमदार यांच्या जवळचे असून त्यांच्या आशिर्वादाने ते या भागात एमडी ड्रग्जचा अवैध व्यवसाय करतात. तसेच सदर ड्रग्ज विकणारे यांचे कनेक्शन हे थेट ड्रग्ज माफिया ललित पाटील (पानपाटील) याच्याशी असल्याची देखील चर्चा आहे.
तरी कृपया आपण वरील ड्रग्जमाफिया ललित पाटील (पानपाटील) जळगाव, चाळीसगाव कनेक्शन तसेच भुसावळ येथील दाबण्यात आलेले ड्रग्ज प्रकरण या दोन्ही विषयांच्या अनुषंगाने आपण सखोल व उच्चस्तरीय चौकशीचे आदेश द्यावेत. याबाबत संशयितांची नावे तसेच संपूर्ण घटनाक्रम यांची माहिती मी स्वतः जिल्हा पोलीस अधिक्षक, जळगाव यांच्याकडे देणार आहे. सदर भुसावळ येथील प्रकरण गंभीर असून गेल्या महिनाभरातील सीसीटीव्ही फुटेज, संबंधित पोलीस अधिकारी, लोकप्रतिनिधी, संशयित यांचे कॉल डिटेल्स तपासण्यात येऊन त्याअनुषंगाने देखील सखोल तपास करण्यात यावा, असेही आमदार मंगेश चव्हाण यांनी म्हटले आहे.