मुंबई (वृत्तसंस्था) महाविकास आघाडी सरकारवर आरोपांचा धुरळा उडवणारे भाजपचे नेते किरीट सोमय्या (Kirit Somaiya) यांना आता जबर धक्का बसला आहे. सोमय्या यांचे पूत्र नील सोमय्यांचा अटकपूर्व जामीन अर्ज मुंबई सत्र न्यायालयाने फेटाळला आहे. त्यामुळे नील सोमय्यांवर अटकेची टांगती तलवार कायम आहे.
पीएमसी बँक घोटाळ्यात आरोपी वाधवान हा किरीट सोमय्या यांच्या मुलाच्या कंपनीत संचालक आहे. पीएमसी बँक घोटाळ्यातील पैसा नील सोमय्या यांनी एका प्रकल्पात गुंतवल्याचा आरोप शिवसेना खासदार संजय राऊत यांनी केला होता. या प्रकरणात अटक होण्याच्या शक्यतेनंतर नील सोमय्या यांनी सत्र न्यायालयात अटकपूर्व जामिनासाठी अर्ज केला होता. काल नील सोमय्या यांच्या अटकपूर्व जामिन अर्जावरील सुनावणी पूर्ण झाली होती. ज्येष्ठ वकील अशोक मुंदरगी यांनी नील सोमय्यांसाठी युक्तीवाद केला. याप्रकरणी झालेल्या सुनावणीवेळी अतिरिक्त सत्र न्यायाधीश दीपक भागवत यांनी नील सोमय्या यांचा जामिन फेटाळून लावला आहे.
संजय राऊत यांनी केले होते आरोप
शिवसेना नेते आणि खासदार संजय राऊत यांनी किरिट सोमय्या आणि नील सोमय्या यांच्यावर यांच्यावर गंभीर आरोप करत, बाप बेटे दोनो जेल में जाएंगे असं वक्तव्य केलं होतं. तसंच नील सोमय्याचे पीएमसी बँक घोटाळ्याली प्रमुख आरोप राकेश वाधवान याच्याशी संबंध असल्याचा आरोपही केला होता. पीएमसी बँक घोटाळ्याली पैसा नील सोमय्यांनी एका प्रकल्पात गुंतवल्याचा आरोपही संजय राऊत यानी केला होता. या आरोपानंतर अटक होईल या भीतीने नील सोमय्या यांनी न्यायालयात धाव घेतली होती. जर या आरोपांवरून एफआयआर दाखल झाल्यास अटकेच्या ७२ तास आधी नोटिस देण्यात यावी असा अर्ज नील सोमय्या यांनी केला होता.
