धाराशिव (वृत्तसंस्था) सासरी होत असलेल्या छळाची पोलिसांकडे तक्रार नोंदविण्यासाठी आवश्यक असलेला अहवाल देण्यासाठी तक्रारदार महिलेकडून महिला समुपदेशकाला सहा हजार ६०० रुपयांची लाच घेतांना लाचलुचपत प्रतिबंधक विभागाने समुपदेशकास रंगेहाथ पकडले. ही कारवाई मंगळवारी दुपारी करण्यात आली.
कळंब तालुक्यातील एका विवाहितेला (२३) त्यांचे पती व सासरचे मंडळी हुंड्यासाठी शारीरिक व मानसिक त्रास देत होते. त्यांच्याविरुद्ध पोलिस ठाण्यात विवाहितेस गुन्हा दाखल करायचा होता. यासाठी विवाहितेस समुपदेशन कार्यालयाचा अहवाल आवश्यक होता. म्हणून यातील विवाहितेने पंचायत समितीमधील तुळजाभवानी जनविकास सामाजिक संस्थेच्या (मोहा, ता. कळंब) महिला समुपदेशन व मदत केंद्रात तक्रारी अर्ज दिला होता.
तक्रारदार विवाहितेला तिच्या बाजूने कळंब पोलिस ठाणे येथे व न्यायालयात अहवाल पाठवण्याकरिता महिला समुपदेशक नीता सुनिल गायकवाड (३७, कल्पना नगर, कळंब) यांना विनंती केली. परंतु, गायकवाड यांनी लाचेची मागणी केली. तक्रारदार विवाहितेला लाच देण्याची इच्छा नसल्यामुळे त्यांनी एसीबीकडे तक्रार दाखल केली. तक्रारीची पडताळ केल्यानंतर मंगळवारी सापळा लावण्यात आला. यामध्ये पंच व साक्षीदारांसमक्ष सोमवारीच शुल्काच्या नावाखाली पूर्वी एक हजार रुपये स्विकारल्याचे मान्य करून ६६०० लाचेची मागणी केली. तसेच तेथेच लाच स्वीकारताच नीता गायकवाड यांना अटक करण्यात आली.
