हदगाव (वृत्तसंस्था) शेतजमिनीच्या रजिस्ट्रीसाठी १ लाख ९९ हजार रुपयांची लाच मागणाऱ्या हदगाव येथील दुय्यम निबंधक बालाजी शंकरराव उत्तरवार व रक्कम स्विकारणारे दस्तलेखक व मुद्रांक विक्रेता यांच्या हस्ते ८१ हजार ६०० रुपयांची लाच घेताना रंगेहात पकडले. ही कारवाई नांदेड लाचलुचपत प्रतिबंधक विभागाच्यावतीने दि.१२ जुलै रोजी शुक्रवारी सायंकाळी ५ ते ६ वाजे दरम्यान हदगांव येथे करण्यात आली. यातील आरोपी दुय्यम निबंधक व इतर तीन आरोपींना अटक केली आहे.
तक्रारदारांने हदगाव येथील गट क्रमांक २५६-२ मध्ये २० गुंठे शेतजमीन खरेदी केली होती. शेतजमिनीच्या रजिस्ट्रीसाठी हदगाव येथील दुय्यम निबंधक उत्तरवार यांना भेटले असता त्यांनी रजिस्ट्रीसाठी नोंदणी व मुद्रांक फीसह एकूण १ लाख ९९ हजार लाचेची मागणी केली. पण तडजोडीअंती १ लाख ९५ हजार देण्याचे ठरले. ही रक्कम दुय्यम निबंधक कार्यालयात काम करणारे मुद्रांक विक्रेता समीउल्ला अजमतउल्ला शेख यांच्याकडे देण्याचे सांगितले.
तक्रारदाराची लाच देण्याची इच्छा नसल्याने त्यांनी नांदेड येथील लाचलुचपत प्रतिबंधक विभागाकडे १२ जुलैला तक्रार दिली. त्यावरून लाचेची पडताळणी केली असता समीउल्ला यांनी १ लाख ९५ हजारांची लाच उपनिबंधक कार्यालय आवारात स्वीकारून आरोपी शेख अबूबकर याच्याजवळ दिली. त्यानंतर नोंदणी व मुद्रांक फी भरल्याची एक लाख १३ हजार ४०० रुपयांची पावती दिली. याप्रकरणात उत्तरवार यांनी नोंदणी व मुद्रांक फीच्या नावाखाली ८१ हजार ६०० रुपयांची लाच समीउल्ला यांच्याद्वारे स्वीकारल्याचे दिसून आले.
याप्रकरणी दुय्यम निबंधक बालाजी उत्तरवार, मुद्रांक विक्रेता समीउल्ला अजमतउल्ला शेख ऊर्फ शमी व मुद्रांक विक्रेता शेख अबूबकर करीम सिद्दीकी ऊर्फ बाबू या तीनही आरोपीस ताब्यात घेण्यात आले असून, त्यांच्यावर रात्री उशिरापर्यंत हदगाव पोलिस ठाण्यात गुन्हा दाखल करण्याची प्रक्रिया सुरू होती. ही सापळा कारवाई पोलिस अधीक्षक डॉ. राजकुमार शिंदे यांच्या मार्गदर्शनात पोलिस उपअधीक्षक प्रशांत पवार, पोलिस निरीक्षक प्रीती जाधव यांच्या पथकाने केली.
