जळगाव (प्रतिनिधी) – सन २०२० मध्ये झालेल्या जिल्हा माध्यमिक शिक्षक व शिक्षकेतर नोकरांची पतपेढी यांनी केलेल्या नोकर भरतीच्या तक्रारीची चौकशी उप-निबंधक जगदीश बारी यांच्याकडे दिली होती. त्यांनी चौकशीचा खोटा अहवाल देण्यासाठी तत्कालीन अध्यक्ष व इतरांना हाताशी धरुन लाखो रुपयांची लाच घेतल्याची तक्रार लाचलुचपत प्रतिबंधक विभागाकडे करण्यात आली आहे. त्यामुळे या प्रकरणाच्या चौकशीसाठी लाचखोर जगदीश बारीसह पंटर देविदास पाटील यांना दोन दिवसांची वाढीव पोलीस कोठडी सुनावली.
अवैध सावकारीविषयी सहकारी संस्थेच्या उपनिबंधकाकडे सुरू असलेल्या सुनावणीदरम्यान तक्रारदार व त्यांच्या पत्नीविरुद्ध गुन्हा दाखल होवू नये तसेच सावकारीबाबत अनुकूल चौकशी अहवाल पाठविण्यासाठी एक लाख ५० हजार रुपयांची लाच घेतल्याप्रकरणी उपनिबंधक जगदीश बारी व जिल्हा बँक असोसिएशनचे मानद कार्यकारी अधिकारी देविदास धनसिंग पाटील (वय ४४, रा. शिवाजी नगर) यांच्यावर कारवाई करण्यात आली होती. याप्रकरणाची चौकशी सुरु असतांना लाचखोर उप-निबंधक जगदीश बारी यांच्या लॉकरमध्ये ९९ लाखांचे सोने, ८ लाख ३६ हजारांची रोकड, साडेदहा किलो चांदी असे एकूण १ कोटी ७ लाख ४४ हजार ७५ रुपयांचे घबाड मिळून आले होते. त्यांच्या पोलीस कोठडीची मुदत संपल्यानतर त्यांना शनिवार दि. २३ मे रोजी न्यायालयात हजर केले. न्यायालयाने त्यांना दि. २५ मे पर्यंत वाढीव पोलीस कोठडी सुनावली. सरकारपक्षातर्फे जिल्हा सरकारी वकील अॅड. सुरेंद्र काबरा यांनी काम पाहिले.
हाताळलेल्या प्रकरणे चौकशीच्या रडारवर
लाचखोर उप-निबंधक बारी बँक लॉकरमध्ये कोट्यावधी रुपयांचे घबाड मिळाल्यानंतर ते सहकारी संस्था येथे कार्यरत असतांना त्याची किती व कोणती प्रकरणे हाताळली आहे. तसेच या प्रकरणांमध्ये देखील त्यांनी लाच स्विकारली आहे का? याचा देखील पोलिसांकडून तपास केला जाणार आहे.
नातेवाईकांच्या नावे खरेदी केली मालमत्ता
लाचखोर उप-निबंधक जगदिश बारी यांनी त्यांच्या कुटुंबियासह नातेवाईकांच्या नावे अवैध मार्गाने जंगम आणि स्थावर मालमत्ता खरेदी केल्याची माहिती पोलिसांना मिळाली असून त्याची चौकशी केली जाणार आहे. या गुन्ह्याची व्याप्ती दिवसेंदिवस वाढत असतांना दुसरीकडे उप-निबंधक बारी हे पोलिस तपासात सहकार्य करीत नसल्याचे पोलिसांनी न्यायालयासमोर सांगितले.
