गोंदिया (वृत्तसंस्था) बहिणीशी प्रेमसंबध जुळविले म्हणून एका संतप्त तरुणाने दुसऱ्या तरुणाला चाकूने भोसकून खून केल्याची घटना २७ नोव्हेंबरच्या पहाटे २ वाजता डॉ. आंबेडकर चौक, गोंडीटोला रोड कुडवा येथे घडली. प्रज्वल अनिल मेश्राम (२०, रा. डॉ. आंबेडकर वॉर्ड, कुडवा, ता. गोंदिया) असे मृतक तरुणाचे नाव आहे, तर संकेत अजय बोरकर (२०) व आदर्श बाबूलाल भगत (२१, दोन्ही रा. कन्हारटोली, गोंदिया) अशी अटक करण्यात आलेल्या आरोपींची नावे आहेत.
बहिणीशी प्रेमसंबंध समजल्यानंतर चाकूने वार करून केला खून !
रामनगर पोलीस ठाण्यांतर्गत येणाऱ्या कुडवा येथील अजित सुनील गजभिये (२४) याने रामनगर पोलिसांत दिलेल्या तक्रारीनुसार, प्रज्वल मेश्राम हा आपला मावसभाऊ अजित गजभिये याच्या सोबत असताना प्रज्वलचा मित्र आरोपी संकेत अजय बोरकर व आदर्श बाबूलाल भगत यांनी त्याची चाकूने भोसकून हत्या केली. मृतक प्रज्वलचे आरोपी संकेतच्या बहिणीशी प्रेमसंबंध होते. ही गोष्ट संकेतला मान्य नव्हती. याच कारणावरून मृतक प्रज्वलच्या घरी जाऊन त्याला घराबाहेर बोलाविले व लाथाबुक्क्यांनी मारहाण केली. आदर्श भगत याने प्रज्वलला पकडून ठेवले तर आरोपी संकेतने त्याच्या हातातील चाकूने वार करून खून केला.
पेट्रोलचा बहाणा करून वादाला केली सुरुवात !
सावत्र आई व सावत्र भाऊ यांच्याशी प्रज्वलचे पटत नसल्याने तो अजित गजभिये यांच्या घराच्या बाजूला असलेल्या स्वतःच्या घरी राहत होता. संकेतच्या बहिणीसोबत प्रज्वलचे प्रेमसंबध असल्याने तो त्याला मारण्याची धमकी देत होता. रात्री १२,३० वाजता घरी पोहोचलेला प्रज्वल झोपला असताना पहाटे २ वाजताच्या सुमारास एका दुचाकीवर आलेल्या आरोपींनी त्यांच्या दाराला ठोठावले. यावेळी अजितने दार उघडले. आमच्या प्रज्वल मेश्राम गाडीचे पेट्रोल संपले, प्रज्वलला उठव असे म्हटले असता पेट्रोलसाठी प्रज्वलला उठविण्यात आले. परंतु पेट्रोलचा बहाणा करून त्याच्याशी वाद घालून त्याचा खून केला.
रुग्णालयात दाखल केले, पण डॉक्टरांनी केले मृत घोषित !
आरोपीच्या पॅटमध्ये खोचलेला चाकू काढून प्रज्वलच्या पोटात खुपसला. त्यामुळे प्रज्वल जखमी होऊन दूर जाऊ लागला. संकेत व आदर्श उर्फ बाबू दोघेही मोटारसायकल एम. एच. ३१ ई व्ही २४१९ ने पळून जात असताना अजितने घाबरून रोडवर पडलेला दगड संकेत व आदर्शच्या दिशेने फेकून मारला. तो दगड त्यांना लागताच गाडीवरून घसरून ते दोघेही रस्त्यावर खाली पडले. ते जमिनीवर पडताच ओरडू लागल्याने भांडणाचा आवाज ऐकून आजूबाजूचे काही लोक जमले होते. लगेच आदर्श गजभिये याच्या मदतीने प्रज्वलला दुचाकीवर बसवून खासगी रुग्णालयात दाखल केले. मात्र तिथे दाखल न करता शासकीय वैद्यकीय महाविद्यालयात नेण्याचा सल्ला दिला. तिथे त्याला डॉक्टरांनी मृत घोषित केले. संशयित आरोपींना पोलिसांनी अवघ्या एका तासात अटक केली.
