यावल (प्रतिनिधी) तालुक्यातील वढोदे ते शिरसाड रस्त्यावर विनापरवाना वाळू वाहतूक करणाऱ्यांनी पर्यवेक्षक म्हणून नेमणुकीस असलेल्या महिला मंडळ अधिकारी बबिता चौधरी यांना कर्तव्यावर असताना धक्काबुकी व शिवीगाळ करून ठार मारण्याची धमकी दिल्याप्रकरणी पोलिसांत अज्ञात वाळू वाहतूक करणाऱ्यांविरुद्ध गुन्हा दाखल करण्यात आला आहे.
तालुक्यातील बामणोद येथे बबिता सुधाकर चौधरी या मंडळ अधिकारी म्हणून कार्यरत आहेत. ३१ ऑगस्ट रोजी त्यांच्याकडे महसूल प्रशासनाने थोरगव्हाण करीता पर्यवेक्षक म्हणून नेमणूक केली होती. ३१ ऑगस्ट रोजी दुपारी १२.१५ वाजेच्या सुमारास पर्यवेक्षक बबिता चौधरी या आपल्या खासगी वाहनाने थोरगव्हाण कडे जात असताना वढोदे प्र. ते शिरसाड या रस्त्यावर वढोदे गावाजवळ विना क्रमांकाचे निळ्या रंगाचे स्वराज कंपनीचे ट्रॅक्टर वाळू वाहतूक करताना आढळून आले.
संबंधित ट्रॅक्टर चालकाकडे बबिता चौधरी यांनी वाळू वाहतुकीचा परवाना मागितला. परंतु, परवाना नसल्याचे सांगत बबिता चौधरी यांच्याशी ट्रॅक्टरचालक नीलेश समाधान सोनवणे याने हुज्जत घातली. तसेच धक्काबुक्की करून शिविगाळ केली व ठार मारण्याची धमकी दिली. तसेच शासकीय कामात अडथळा निर्माण केला. दरम्यान, संबंधित ट्रॅक्टर चालकाने घटनास्थळावरून ट्रॅक्टर नीलेश सोनवणे (रा. थोरगव्हाण) व त्याच्या सोबत असलेल्या एका अनोळखी व्यक्तीने पळवून नेले. या प्रकरणी मंडळ अधिकारी बबिता चौधरी यांनी यावल पोलीस ठाण्यात दिलेल्या फिर्यादीवरुन विविध कलमान्वये गुन्हा दाखल करण्यात आला आहे.
