कासोदा (ता. एरंडोल) कापूस वेचण्यासाठी घरातील सर्व शेतात गेल्याचा फायदा घेत अज्ञात चोरट्यांनी शेतकऱ्याच्या घरातून भरदिवसा सोने-चांदीचे दागिने, रोकड असा दीड लाखांचा ऐवज लंपास केल्याची घटना उघडकीस आली आहे.
या संदर्भात अधिक असे की, साईपार्कमधील रहिवासी भागवत त्र्यंबक चौधरी शुक्रवारी (ता. २५) सकाळी घराला कुलूप लावून पत्नीसह शेतात कापूस वेचणीसाठी गेले होते. घरी कोणी नसल्याची संधी साधत चोरट्यांनी सकाळी साडेआठ ते सायंकाळी पाचच्या दरम्यान घराचे कुलूप तोडून कपाटातील सोन्या-चांदीचे दागिने, बॅगमधील सात हजारांची रोकड व कापसाचे दोन बोथे, असा एकूण सुमारे एक लाख ५८ हजार ७७० रुपयांचा ऐवज चोरून नेला. भागवत चौधरी सायंकाळी शेतातून घरी आल्यानंतर त्यांना घराच्या दरवाजाचे कुलूप तुटलेले आढळून आले. कपाट उघडे व त्यातील सामान अस्ताव्यस्त फेकलेले दिसून आले. चोरी झाल्याचे लक्षात आले. याबाबत त्यांनी कासोदा पोलिसांत दिलेल्या फिर्यादीवरून चोरट्यांविरुद्ध गुन्हा दाखल झाला आहे. सहाय्यक पोलिस निरीक्षक नीता कायटे यांच्या मार्गदर्शनाखाली सहाय्यक फौजदार सहदेव घुले, इम्रान पठाण, समाधान तोंडे, प्रवीण हटकर तपास करीत आहेत. दरम्यान, गावात चोरी आणि घरफोडीच्या घटना वाढल्या आहेत.
