जळगाव (प्रतिनिधी) शहरातील तांबापुरा परिसरात असलेल्या फुकटपुरा भागात घरफोडी करून दीड लाखाचा ऐवज लंपास केल्याची घटना आज सकाळी उघडकीस आली आहे.
यासंदर्भात अधिक असे की, पंचशील नगरात राहणारे सरफराज खान अयुब खान व त्यांचा मुलगा दोन्ही खाजगी वाहन चालक म्हणून काम करतात. सोमवारी रात्री १० च्या सुमारास खान कुटुंबीय खालील घराला कुलूप लावून वरील माळ्यावर झोपण्यास गेले. रात्रीच्या वेळी चोरट्यांनी खान यांच्या वरील खोलीला आणि शेजारी राहणाऱ्या इतर घराला बाहेरून कडी लावली. खान यांच्या घराचा कडी कोंडा तोडत कपाट फोडून १५ ग्रॅम सोन्याची पोत, चांदीचे कडे, चांदीची पोत, चांदीची अंगठी, १२ हजार रोख असा दीड ते दोन लाखांचा ऐवज लंपास केला. मंगळवारी सकाळी ७ वाजेच्या सुमारास सरफराज खान हे उठले असता दरवाजा उघडत नसल्याने त्यांनी शेजाऱ्यांची संपर्क साधला. शेजाऱ्यांचा देखील दरवाजा उघडत नसल्याने त्यांनी परिसरातील इतर काही नागरिकांना संपर्क करून बोलावले. खान कुटुंबीय खाली आल्यानंतर घडलेला प्रकार त्यांच्या लक्षात आला. याप्रकरणी एमआयडीसी पोलिसात तक्रार नोंद करण्यात आली आहे.
