जळगाव (प्रतिनिधी) – मोबाईलवर आलेल्या एका अनोळखी लिंकवर क्लिक करणे जळगावातील शेतकऱ्याला चांगलेच महागात पडले. व्हॉट्सअॅप सुरू होत नसल्याने लिंकवर क्लिक करून मोबाईल क्रमांक टाकताच सायबर भामट्यांनी त्याच्या मोबाईलचा ताबा घेत थेट बँक खात्यावर डल्ला मारला. अवघ्या काही तासांत खात्यातून तब्बल ६ लाख ८० हजार रुपये परस्पर वळते करण्यात आल्याची धक्कादायक घटना उघडकीस आली आहे. याप्रकरणी सायबर पोलीस स्टेशन जळगाव येथे अज्ञात व्यक्तीविरुद्ध गुन्हा दाखल करण्यात आला आहे.
फिर्यादी अक्षय राजेंद्र पाटील (वय ३५, रा. प्लॉट नं. ४९, गट नं. ७६/१/२, कोल्हे नगर, गव्हर्नमेंट इंजिनिअरिंग कॉलेजच्या पाठीमागे, जळगाव) हे शेती व्यवसाय करतात. त्यांचे सारस्वत को-ऑपरेटीव्ह बॅकच्या रिंगरोड शाखेत ओव्हरड्राफ्ट खाते असून त्यास मोबाईल क्रमांक लिंक करण्यात आला होता. मात्र ते नेटबँकिंग वापरत नसल्याचे तसेच त्यांच्या मोबाईलमध्ये कोणतेही बँकिंग किंवा मोबाईल बँकिंग अॅप इन्स्टॉल नसल्याचे त्यांनी फिर्यादीत नमूद केले आहे.
दि. १६ मे रोजी दुपारी साडेदोन वाजेच्या सुमारास त्यांच्या व्हीओ टी-४ मोबाईलमधील व्हॉट्सअॅप अॅप अचानक सुरू होत नव्हते. याचवेळी मोबाईलवर आलेल्या एका अनोळखी लिंकवर त्यांनी क्लिक केले. लिंक उघडल्यानंतर दोन वेळा मोबाईल क्रमांक टाकून ‘रिकन्फर्मेशन’ देण्यात आले. त्यानंतर व्हॉट्सअॅप पुन्हा सुरू झाले. मात्र ही लिंक नेमकी कशाची होती किंवा ती मोबाईलवर कशी आली याबाबत आपल्याला काहीही आले आहे. माहिती नसल्याचे फिर्यादीत नमूद करण्यात
अन् पैसे झाले वडती
या घटनेनंतर काही वेळातच त्यांच्या मोबाईलवर सारस्वत को-ऑपरेटीव्ह बॅककडून ओटीपी तसेच ‘मोबाईल बँकिंग ऑन झाले’ अशा आशयाचे संदेश येण्यास सुरुवात झाली. सुरुवातीला त्यांनी याकडे गांभीर्याने पाहिले नाही. मात्र रात्री १०.२० वाजता खात्यातून ५ लाख रुपये डेबिट झाल्याचा संदेश प्राप्त होताच त्यांना धक्का बसला. त्यानंतर ९० हजार, ९० हजार, ९ हजार आणि ९ हजार रुपये अशा विविध टप्प्यांत रक्कम काढण्यात आल्याचेही संदेश आले. एकूण ६ लाख ८० हजार रुपये खात्यातून परस्पर वळते करण्यात आले.
सायबर पोलिसांकडे धाव
फसवणुकीची बाब लक्षात येताच अक्षय पाटील यांनी तत्काळ बँकेच्या ग्राहक सेवा केंद्राशी संपर्क साधून खाते गोठविण्याची विनंती केली. तसेच दुसऱ्याच दिवशी राष्ट्रीय सायबर गुन्हे नोंदणी पोर्टलवर ऑनलाईन तक्रार दाखल केली. त्यानंतर त्यांनी प्रत्यक्ष सायबर पोलीस स्टेशन जळगाव येथे धाव घेत फिर्याद दिली. सायबर पोलिसांनी अज्ञात व्यक्तीविरुद्ध भारतीय न्याय संहिता कलम ३१८(४), ३३६(२), ३३६ (३) तसेच माहिती तंत्रज्ञान अधिनियम कलम ६६ (डी) अंतर्गत गुन्हा दाखल केला आहे. प्राथमिक तपासात अनोळखी लिंकच्या माध्यमातून मोबाईलचा प्रवेश मिळवून आरोपींनी मोबाईल बँकिंग सक्रिय केल्याचा संशय व्यक्त करण्यात येत आहे. या प्रकरणाचा पुढील तपास पोलीस निरीक्षक सतीश गोराडे यांच्या मार्गदर्शनाखाली सुरू आहे.
