मुंबई (वृत्तसंस्था) मुख्यमंत्री उद्धव ठाकरे यांनी आज (११ मार्च) कोरोनाची लस घेतली. मुंबईतील जे. जे. रुग्णालयात त्यांनी कोवँक्सिन या लसीचा पहिला डोस घेतला. मुख्यमंत्री कार्यालयाने मुख्यमंत्र्यांचा लशीचा डोस घेतानाचा फोटो ट्विट करत ही माहिती दिली. आज दुपारी साडेबाराच्या सुमारास मुख्यमंत्री लस घेतली. यावेळी त्यांच्या पत्नी रश्मी ठाकरे आणि त्यांचे पुत्र तसेच राज्याचे पर्यटन मंत्री आदित्य ठाकरे हे सुद्धा यावेळी उपस्थित होते.
कोरोना लसीसंदर्भात नागरिकांमध्ये काहिसा संभ्रम आहे. हा संभ्रम दूर व्हावा या हेतूने उद्धव ठाकरेंनी कोरोनाची लस घेतल्याचे सांगितले जात आहे. ही लस घेत सर्वांनीच लसीकरणाच्या मोहिमेमध्ये सहभागी व्हावे असा संदेशच मुख्यमंत्री ठाकरे यांनी राज्यातील जनतेला दिला आहे. मुख्यमंत्री उद्धव ठाकरे यांनी कोव्हॅक्सिन ही लस घेतल्याचे डॉ. तात्याराव लहाने यांनी सांगितले. मुख्यमंत्री ठाकरे यांच्या बरोबरच मिलिंद नार्वेकर यांनी देखील कोरोनाची लस घेतली आहे. विधीमंडळाच्या अर्थसंकल्पीय अधिवेशनानंतर मी कोविडची लस घेणार असल्याचे मुख्यमंत्री उद्धव ठाकरे यांनी म्हटले होते. त्यानंतर आज मुंबईतील जे. जे. रुग्णालयात उद्धव ठाकरे यांनी कोविडची लस घेतली. ही लस घेण्यासाठी मुंबईतील जे. जे. रुग्णालयात उद्धव ठाकरे सहकुटुंब दाखल झाले. मुख्यमंत्र्यांची प्राथमिक तपासणी केल्यानंतर त्यांना लस देण्यात आली. यानंतर त्यांना अर्धा तास देखरेखीखाली ठेवण्यात आले होते.
कोविड लस टोचून घेताना काहीच कळत नाही. या लशीबाबत कोणत्याही प्रकारची भीती किंवा मनात संभ्रम बाळगण्याचे कारण नाही, असे मुख्यमंत्री ठाकरे म्हणाले. राज्यात कोरोनाचा धोका वाढत असून जे लशीसाठी पात्र नागरिक आहेत, त्यांनी ही लस घ्यावी असे आवाहनही मुख्यमंत्र्यांनी केले आहे.
