नाशिक (वृत्तसंस्था) तुम्ही संदीप कुमार आहात ना… तुमचा मनी लाँड्रींग प्रकरणात सहभाग असल्याने तुम्हाला अटक करावी लागेल, अशी भिती घालून व आम्ही दिल्ली पोलीस, सीबीआय आणि टीआरएआय मधून बोलत असल्याचे भासवून सायबर चोरट्यांनी एकास २३ लाखांचा गंडा घातला. याशिवाय शेअर ट्रेडिंगमधून मोठा आर्थिक फायदा मिळवून देण्याच्या आमिषाने एका डॉक्टर महिलेसह पाच जणांची सुमारे ४७ लाखांची फसवणूक करण्यात आल्याचा प्रकार पुढे आला आहे. त्यामूळे सायबर पोलीस स्टेशनमध्ये एकूण ७० लाखांच्या फसवणुकीचे दोन गुन्हे दाखल झाले आहेत.
गंगापूर रोड परिसरात राहणाऱ्या एका ५४ वर्षीय डॉक्टर महिलेने सायबर पोलीस स्टेशनमध्ये फसवणुकीची फिर्याद दिली आहे. २२ नोव्हेंबर २०२३ ते २६ जुलै २०२४ या कालावधीत संशयितांनी सोशल मिडियाच्या माध्यमातून त्यांच्यासह आणखी चार जणांशी संपर्क साधला. शेअर ट्रेडिंगमध्ये गुंतवणूक केल्यास अधिक परतावा मिळू शकतो, असे आमिष दाखवित विश्वास संपादीत केला. त्यांना वेगवेगळ्या बँक खात्यांवर पैसे पाठविण्यास भाग पाडले. संबंधित डॉक्टर महिलेसह चार जणांची ४६ लाख ४७ हजार ३४८ रूपयांची फसवणूक झाल्याचे तक्रारीत म्हटले आहे.
दुसरा प्रकार १३ सप्टेंबर रोजी घडला असून वर्षीय महिलेने याप्रकरणी फिर्याद दिली आहे. संशयितांनी या महिलेशी व्हॉटसअप कॉलद्वारे संवाद साधला. आम्ही दिल्ली पोलीस, सीबीआय, टीआरएआय मधून बोलत असल्याचे भासवून संदीप कुमार मनी लाँड्रींग प्रकरणात तुमचा समावेश असल्याचे सांगत अटक करण्याची भीती घातली. केसच्या तपासाच्या नावाखाली त्यांना वेगवेगळ्या बँक खात्यांमधून २३ लाख रुपये पाठविण्यास भाग पाडले. आर्थिक फसवणूक झाल्याची कैफियत या महिलेने मांडली आहे.
