पणजी (वृत्तसंस्था) सामाजिक कार्यकर्त्यांच्या एका व्हॉटसअप ग्रुपमध्ये अश्लील व्हिडिओ टाकला म्हणून गोव्याचे उपमुख्यमंत्री चंद्रकांत उर्फ बाबू कवळेकर यांच्याविरोधात विरोधकांकडून पोलिसांत तक्रार दाखल करण्यात आली आहे. तर उपमुख्यमंत्री कवळेकर यांनीही पोलीस स्टेशन गाठून आपला फोन हॅक झाल्याची तक्रार दाखल केलीय.
काही सामाजिक कार्यकर्ते सहभागी असलेल्या या व्हॉटसअप ग्रुपमध्ये उपमुख्यमंत्री चंद्रकांत कवळेकर यांच्या मोबाईलमधून रविवारी अर्ध्यारात्री हा व्हिडिओ संदेश व्हॉटसअप ग्रुपवर शेअर करण्यात आला होता.यानंतर कवळेकर यांनी सायबर पोलिसांत दाखल केलेल्या तक्रारीत ‘ज्यावेळी फोनमधून हा व्हिडिओ मॅसेज धाडण्यात आला त्यावेळी फोनच्या जवळपासही आपण नव्हतो तर यावेळी आपण झोपलो होतो’ असं म्हटलंय. काही उपद्रवी घटकांनी ‘व्हिलेजेस ऑफ गोवा’ नावाने बनवण्यात आलेल्या व्हॉटसअप ग्रुपमध्ये हा व्हिडिओ पाठवला. गुन्हेगारी हेतूनं काही लोकांनी मुद्दाम आपलोये नाव वापरून हा व्हिडिओ या व्हॉटसअप ग्रुपवर धाडला, असंही कवळेकर यांचं म्हणणं आहे. वाईट हेतूने आपल्या फोनशी छेडछाड करण्यासाठी आणि अश्लील व्हिडिओ अपलोड करण्यासाठी दोषींविरुद्ध कठोर कारवाई केली जावी, अशीही उपमुख्यमंत्र्यांकडून मागणी करण्यात आलीय.
