मुंबई (वृत्तसंस्था) प्रक्षोभक भाषण केल्याप्रकरणी शिवसेना उद्धव बाळासाहेब ठाकरे गटाचे खासदार संजय राऊत यांना बेळगाव कोर्टाने समन्स बजावलं आहे. त्यांना १ डिसेंबरला न्यायालयात हजर राहण्याचे आदेश देण्यात आले आहेत. यावरून संजय राऊत यांनी भाजपच्या कर्नाटक सरकारवर गंभीर आरोप केले आहेत.
कोर्टात सीमावादावर सुनावणी, मग कर्नाटकच्या मुख्यमंत्र्यांचा जतमधील गावांवर दावा, काल कर्नाटकातील एका संघटनेनं महाराष्ट्रातील गावात येऊन झेंडे फडकावले आणि मला आलेले समन्स. यामागची क्रोनोलॉजी समजून घेण्यासारखी आहे. कर्नाटकात मला बोलावून माझ्यावर हल्ल्याचा कट आखला गेला आहे. माझ्या अटकेची तयारी केली जात आहे. पण मी घाबरणारा नाही. मी तिथं जाणार, असं संजय राऊत म्हणाले. तसेच कर्नाटक-महाराष्ट्र सीमा वादामध्ये केंद्रीय गृहमंत्री अमित शहा यांनी लक्ष घालावे. अन्यथा रक्तपात होईल, असा इशाराही राऊतांनी दिला. आज पत्रकार परिषदेत संजय राऊत यांनी पुन्हा सीमा वादावरून कर्नाटक सरकार तसेच शिंदे-फडणवीस सरकारवर टीकेची झोड उठवली आहे. दरम्यान, राऊत केवळ प्रसिद्धीसाठीचा स्टंट असल्याची टीका भाजप नेते प्रवीण दरेकर यांनी केली आहे.