नंदुरबार (प्रतिनिधी) धरणगाव येथून पालक भुसावळ सुरत एक्सप्रेसच्या जनरल डब्यात बसले आणि नवजात बालकाला ट्रेनमध्ये सोडून अमळनेरला उतरून गेले. धक्कादायक म्हणजे ते नवजात बालक थेट नंदुरबार येथे पोहोचले. यामुळे खळबळ उडाली आहे. लोहमार्ग पोलीस ठाणे, नंदुरबार येथे याप्रकरणी अज्ञात पालकांविरुद्ध गुन्हा दाखल करण्यात आला असून तपास सुरू आहे.
९ मे २०२५ रोजी सायंकाळी ९.३० ते १०.१० च्या दरम्यान धरणगाव ते अमळनेर स्थानकादरम्यान १९००८ अप भुसावळ-सुरत एक्सप्रेसच्या WR 144504 क्रमांकाच्या जनरल डब्यात एक महिन्याच्या नवजात पुरुष बालकास बेवारस स्थितीत सोडण्यात आले होते. बालकास त्या डब्यात कोणतीही जबाबदारी न घेता सोडून दिल्याची प्राथमिक माहिती असून, पोलिसांनी यासंदर्भात भारतीय दंड विधान ९३ बी.एन.एस. २०२३ अंतर्गत अ-४८/२०२५ गुन्हा नोंदवला आहे. या संदर्भात अनिता शांताराम चौधरी (वय ५२) यांनी फिर्याद दिलेली आहे.
तपास अधिकारी अल्का अढाळे यांच्याकडून बालकाच्या पालकांचा व नातेवाईकांचा शोध घेतला जात आहे. तसेच, इतर पोलीस ठाण्यांनाही विनंती करण्यात आली आहे की, अशा प्रकारच्या बालक चोरीच्या घटना त्यांच्या कार्यक्षेत्रात घडल्या असल्यास त्याची माहिती लोहमार्ग पोलीस ठाणे, नंदुरबार येथे त्वरीत पाठवावी. सदर बालक सध्या पोलिसांच्या संरक्षणाखाली आहे.
