जयपूर (वृत्तसंस्था) एका विवाहित पोलीस कॉन्स्टेबलनं एका तरुणीवर ४ वर्षे बलात्कार (Young woman raped by police) केल्याची धक्कादायक घटना उघडकीस आली आहे. दरम्यान, पीडित तरुणी गर्भवती राहिल्यानंतर, तिच्यावर दबाव टाकून तिला गर्भपात करण्यास भाग पाडलं आहे. त्यानंतर लग्नाच्या बहाण्याने तो तरुणीचे वारंवार शोषण करत राहिला. पोलिसांनी बलात्कारासह विविध कलमान्वये गुन्हा दाखल (FIR lodged) केला आहे.
सावन कुमार असं गुन्हा दाखल झालेल्या पोलीस कॉन्स्टेबलचं नाव असून तो राजस्थानातील जयपूर आयुक्तालयात कार्यरत आहे. पोलिसांनी दिलेल्या माहितीनुसार, नराधम पोलिसाचं ११ वर्षांपूर्वी लग्न झालं होतं. पण लग्नाच्या चार वर्षानंतर त्याचा पत्नीशी वाद झाला. त्यामुळे गेल्या सात वर्षांपासून तो पत्नीपासून वेगळं राहू लागला. पत्नीपासून घटस्फोटासाठी न्यायालयात खटला सुरू आहे. पण याबाबत अद्याप कोणताही निर्णय झालेला नाही.
दरम्यान आरोपी पोलीस हवालदार पीडित तरुणीच्या संपर्कात आला होता. आरोपीनं पीडितेशी गोड बोलून तिचा विश्वास संपादन केला. २०१५ साली आरोपी पीडितेला निवाई येथील एका हॉटेलात घेऊन गेला. याठिकाणी आरोपीनं पीडितेच्या शीतपेयात गुंगीचं औषध टाकून तिच्यावर बलात्कार केला. नराधम आरोपी एवढ्यावरच थांबला नाही. तर त्यानं पीडितेचे काही अश्लील फोटो देखील काढले. दरम्यान पीडित तरुणी गर्भवती राहिल्यानंतर त्यानं तिचा गर्भपात देखील घडवला आहे.
यानंतरही आरोपीनं लग्नाचं आमिष दाखवत पीडितेचं अनेकदा लैंगिक शोषण केलं आहे. दरम्यान पीडितेनं लग्नासाठी तगादा लावल्यानंतर आरोपीनं तिला टाळायला सुरुवात केली. तसेच तिच्याशी संपर्क तोडला. अखेर आपली फसवणूक होतं असल्याचं लक्षात आल्यानंतर पीडित तरुणीनं पोलिसांत फिर्याद दाखल केली आहे. पोलिसांनी बलात्कारासह विविध कलमाअंतर्गत गुन्हा दाखल केला आहे. या घटनेचा पुढील तपास पोलीस करत आहेत.
