धरणगाव (प्रतिनिधी) – येथील शहरातील प्रभाग क्रमांक 10 मधील वैदू वाडा व कुंभार वाडा येथील जीर्ण झालेल्या मटण मार्केटमुळे आजूबाजूच्या रहिवाशांना मोठा त्रास सहन करावा लागत आहे. त्यामुळे हे मटण मार्केट तात्काळ दुसऱ्या योग्य जागी स्थलांतरित करण्यात यावे अशी मागणी प्रभाग क्रमांक 10 चे नगरसेवक गुलाब मराठे यांनी केली आहे.
नगरसेविका अंजली विसावे यांच्यासह इतर नगरसेवकांसोबत गुलाब मराठे यांनी धरणगाव नगरपालिकेचे मुख्यअधिकारी जनार्दन पवार व धरणगाव नगरीचे लोकनियुक्त नगराध्यक्ष लीलाताई चौधरी यांना यासंदर्भात निवेदन सादर केले. यावेळी नगरसेवक किशोर कंखरे कडू बयस,चेतन जाधव, पप्पू भावे ,गटनेते विलास महाजन,पवन महाजन,हाजी इब्राहिम ,पप्पू कंखरे,भूषण धनगर, ललित येवले ,मच्छिंद्र पाटीलदेखील उपस्थित होते.
गेल्या अनेक वर्षांपासून वैदू वाडा आणि कुंभार वाडा येथे हे मटण मार्केट अस्तित्वात आहे. परंतु गेल्या काही वर्षांत या परिसरात मोठ्या प्रमाणात रहिवास वाढला आहे. सध्या मार्केटच्या आजूबाजूला घरे झाल्यामुळे नागरिकांना दररोज दुर्गंधी आणि अस्वच्छतेचा सामना करावा लागत आहे. तसेच मार्केटची इमारतही जीर्ण झाली असून ती कधीही कोसळू शकते. त्यामुळे येथे खरेदीसाठी येणाऱ्या नागरिकांसह स्थानिक रहिवाशांच्या जीवाला धोका निर्माण झाला आहे.
निवेदनात असेही म्हटले आहे की, सध्याच्या ठिकाणी अस्वच्छतेमुळे डास आणि इतर किडे वाढत आहेत. यामुळे नागरिकांच्या आरोग्याला धोका निर्माण होऊ शकतो. त्यामुळे नागरिकांच्या आरोग्य आणि सुरक्षिततेच्या दृष्टीने हे मटण मार्केट शहराबाहेरील किंवा लोकवस्तीपासून दूर असलेल्या सुसज्ज जागी स्थलांतरित करणे आवश्यक आहे.
नगराध्यक्ष लीलाताई चौधरी यांनी नगरसेवकांची मागणी गांभीर्याने समजून घेतली असून याबत लवकरच प्रशासनाकडून योग्य निर्णय घेऊन तोडगा काढू
प्रभागातील नागरिकांच्या दैनंदिन अडचणी लक्षात घेऊन नगरपालिकेने या प्रश्नावर तातडीने कार्यवाही करावी अशी अपेक्षा नगरसेवक गुलाब मराठे यांनी व्यक्त केली.
