जळगाव (प्रतिनिधी) कोरोनाबाधित महिलेचा व्हेंटीलेटर अभावी मृत्यू झाल्याचा आरोप करत नातेवाईकांनी निलकमल हॉस्पिटलमध्ये जोरदार तोडफोड केल्याप्रकरणी डॉ.मनोजकुमार टोके यांच्या फिर्यादीवरून उमेश पांडुरंग पाटीलसह पाच ते सहा जणांवर गुन्हा दाखल करण्यात आला आहे.
यासंदर्भात डॉ. मनोजकुमार रामदास टोके यांनी दिलेल्या फिर्यादीत म्हटले आहे की, संगीता पांडुरंग पाटील यांचा कोरोना रिपोर्ट पॉझिटिव्ह आल्याने त्यांना २९ सप्टेंबर रोजी आमच्या रुग्णालयात दाखल करण्यात आले होते. त्यांच्यावर आमच्या रुग्णालयात उपचार सुरू होता. १ ऑक्टोबर रोजी त्यांची प्रकृती जास्त खराब झाल्याने त्यांना व्हेंटिलेटर लावण्यात आले होते. तसेच रुग्णाच्या नातेवाईकांना याबाबत अवगत केले होते. ११ ऑक्टोंबर रोजी सकाळी साडेदहा वाजेच्या सुमारास मी व माझे सहकारी डॉ. राजेंद्र फेगडे, डॉ. रोहन केळकर, डॉ.विजय पाटील व इतर सहकारी असे रुग्णालयात हजर असताना संगीता पाटील यांची प्रकृती अचानक खराब झाली. त्यांची तपासणी केली असता त्यांना श्वास घेण्यास त्रास होत होता. याबाबत लागलीच मी त्यांच्या नातेवाईकांना माहिती कळविली. उपचार सुरू असताना संगीता पाटील यांना कार्डीओ अॅटक आल्यामुळे त्यांचा दुपारी साडेबारा वाजेच्या सुमारास मृत्यू झाला. मृत्यू झाल्यानंतर नातेवाईक उमेश पाटील व त्यांच्या सोबत इतर दोन जणांना आम्ही केबिनमध्ये बोलावून त्यांच्या पेशंटच्या मृत्यू संदर्भात माहिती दिली. परंतू त्यांनी आम्हाला अश्लील शिवीगाळ केली. त्यानंतर आयसीयूमध्ये नातेवाईक एकत्र येऊन रुग्णालयातील कर्मचारी पवन बिरारी यांना मारहाण करून गोंधळ केला. त्यांच्याबरोबरमध्ये इतर रूग्ण देखील घाबरले. तसेच वरच्या मजल्यावर असलेल्या हॉस्पिटलचे मुख्य ऑक्सिजन पॅनल तोडण्याचा प्रयत्न केला. तसेच एकाने रिसेप्शन जवळील डॉक्टर केबिनची काच तोडली. तसेच इतर नातेवाईक देखील गोंधळ घालू लागले. त्यांच्यापैकी एका महिलेने खुर्चीकडे जोरात फेकून मारली. उमेश पाटील व त्यांचे नाते हॉस्पिटल गोंधळ घालून हॉस्पिटलचे जवळपास ५० हजाराचे नुकसान केले आहे. त्यानंतर काही वेळातच तीथे पोलिस आले व त्यांनी नातेवाइकांना शांत केले. यासंदर्भात भादवि कलम १४३, १४७, १४८,१४९,३२३,४२७,२९४ साथीचे रोग अधिनियम ९८७ (३) प्रमाणे गुन्हा दाखल करण्यात आलेला आहे.
